ԱՄՆ-ում հայտնել են՝ տասնյակ նավեր աննկատ անցել են Հորմուզի նեղուցով

Ամերիկյան ԱՄՆ Կենտրոնական հրամանատարությունը վերջին երեք շաբաթների ընթացքում աջակցել է մոտ 70 առևտրային նավի անցմանը Հորմուզի նեղուցով։ Այս մասին հայտնել է The New York Times-ը՝ հղում անելով ամերիկացի պաշտոնյաներին։

Ըստ հրապարակման՝ նավերի անցումը կազմակերպվել է անվտանգության բարձր ռիսկերի պայմաններում, քանի որ Իրանի շուրջ բանակցությունները շարունակում են բարդ ընթացք ունենալ։ Նշվում է, որ մի շարք նավեր անցման ընթացքում անջատել են իրենց տրանսպոնդերները՝ շարժը հնարավորինս աննկատ իրականացնելու նպատակով։

Ավելի վաղ Դոնալդ Թրամփը հայտարարել էր, որ Իրանի հետ հնարավոր համաձայնության շրջանակում Հորմուզի նեղուցը պետք է վերաբացվի ազատ նավարկության համար։ Հունիսի 1-ին նա նաև նշել էր, որ բանակցային գործընթացի վրա ազդում են ԱՄՆ ներսում հնչող հակասական կոչերը՝ մի մասը պահանջում է արագացնել, մյուսը՝ դանդաղեցնել բանակցությունները։

Հորմուզի նեղուցը համաշխարհային էներգետիկ շուկայի կարևորագույն ուղիներից է, որով անցնում է նավթի և հեղուկացված գազի միջազգային մատակարարումների զգալի մասը, ուստի այնտեղ ստեղծված ցանկացած լարվածություն արագ անդրադառնում է համաշխարհային շուկաների վրա։