«Սպարտակը» սահմանել է Ռուսաստանի նոր ռեկորդը

Մոսկվայի «Սպարտակ» ֆուտբոլային ակումբը սահմանել է Ռուսաստանի սպորտային նոր ռեկորդ՝ տնային խաղերի օրերին գրանցված եկամուտների ցուցանիշով։ Տեղեկությունը հրապարակել է Ռուսաստանի ֆուտբոլային միությունը։

2025 թվականի ընթացքում «կարմիր-սպիտակները» տնային հանդիպումների օրերին վաստակել են 2 միլիարդ 110 միլիոն ռուբլի։ Եկամուտը ձևավորվել է տոմսերի վաճառքից, ակումբային խորհրդանիշներով ապրանքների իրացումից և սննդի վաճառքից։ Այսպիսով, ռուսական սպորտի պատմության մեջ առաջին անգամ մեկ ակումբի տարեկան խաղային հասույթը գերազանցել է 25 միլիոն եվրոն։

Երկրորդ տեղում է հայտնվել Սանկտ Պետերբուրգի «Զենիթը», որը «Սպարտակից» հետ է մնացել շուրջ 50 միլիոն ռուբլով։ Լավագույն եռյակը եզրափակել է «Կրասնոդարը»՝ գրանցելով 1 միլիարդ 484 միլիոն ռուբլու եկամուտ տնային խաղերի օրերին։ Ավելի վաղ նաև հերքվել էին Մոսկվայի «Լոկոմոտիվի»՝ ավելի քան մեկ միլիարդ ռուբլու պարտքերի մասին տեղեկությունները։