Տհաճ հոտի պատճառով ինքնաթիռում ուղևորներ հոսպիտալացվել են

ԱՄՆ-ում Frontier Airlines ավիաընկերության ինքնաթիռը ստիպված է եղել դադարեցնել թռիչքի մեկնարկը՝ սրահում տարածված անհասկանալի և տհաճ հոտի պատճառով։ Միջադեպը տեղի է ունեցել մայիսի 30-ին՝ Օռլանդոյի միջազգային օդանավակայանում։

Դեպքից հետո օդանավը վերադարձվել է նստեցման ելքի մոտ, իսկ ուղևորներին տեղում զննել են բժիշկները։ Տեղեկությունների համաձայն՝ երեք ուղևոր տեղափոխվել է հիվանդանոց՝ լրացուցիչ բուժզննման համար։

Նշվում է, որ սա վերջին ամիսների ընթացքում նմանատիպ առաջին դեպքը չէ․ ավելի վաղ մեկ այլ ավիաընկերության ինքնաթիռ նույնպես արտակարգ վայրէջք էր կատարել սրահում հայտնված տարօրինակ հոտի պատճառով։