Ընտրական գործընթացներում ատելության խոսքի դեմ պայքարը՝ իրավապահների ուշադրության կենտրոնում

Արդարադատության նախարարության կողմից ՄԱԶԾ աջակցությամբ իրականացվող «Բարեփոխումների խթանում՝ Հայաստանում ընտրական համակարգերի թափանցիկ և ներառական կառավարման նպատակով» (ARTEMIS) ծրագրի շրջանակներում տեղի է ունեցել «Ատելության խոսքը ընտրական գործընթացներում. նույնականացում, իրավական գնահատում և արձագանք» թեմայով վերապատրաստման դասընթաց՝ դատախազների, քննիչների և ՆԳՆ ոստիկանների համար։

Դասընթացին բացման խոսքով հանդես է եկել Արդարադատության նախարարի տեղակալ Աննա Կարապետյանը։ Նախարարի տեղակալը կարևորել է թեմայի արդիականությունը՝ հատկապես ընտրական գործընթացների համատեքստում, ընդգծելով, որ ատելության խոսքի և ապատեղեկատվության տարածումը լուրջ մարտահրավեր է ժողովրդավարական ինստիտուտների կայունության և հանրային վստահության ապահովման համար։

Դասընթացը նպատակ ուներ ամրապնդել ատելության խոսքի վերաբերյալ մասնագիտական գիտելիքները և զարգացնել համապատասխան մարմինների ներկայացուցիչների ինստիտուցիոնալ կարողությունները՝ ընտրական գործընթացներում նման դրսևորումները արդյունավետ նույնականացնելու, իրավական տեսանկյունից պատշաճ գնահատելու և համաչափ արձագանք ապահովելու նպատակով։

Դասընթացավարները մասնակիցներին ներկայացրել են ատելության խոսքի միջազգային չափանիշներն ու իրավական մոտեցումները, դրա տեսակները, խոսքի ազատության իրավական սահմանումները, ինչպես նաև ատելության շարժառիթով հանցագործությունների քննության առանձնահատկությունները՝ հատուկ շեշտադրելով դրա կանխարգելման կարևորությունը։ Դասընթացը ներառել է նաև տեսական և գործնական բաղադրիչների համադրություն՝ ուղղված մասնակիցների կարողությունների զարգացմանն ու գործնական հմտությունների ամրապնդմանը, միջգերատեսչական համագործակցությանը և արձագանքման մեխանիզմներին: