Արարատ Միրզոյանը ամփոփել է ՀՀ ԱԳՆ գործունեության հիմնական արդյունքներն ու ձեռքբերումները

Հունիսի 8-ին ՀՀ ԱԳ նախարար Արարատ Միրզոյանը ԱԺ արտաքին հարաբերությունների, տարածաշրջանային և եվրասիական ինտեգրման հարցերի, եվրոպական ինտեգրման հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստին ներկայացրել է ՀՀ ԱԳՆ կողմից իրականացված հինգ հիմնական ծրագրերը և դրանց իրականացման արդյունքում գրանցված ձեռքբերումները

2025թ.-ին ռազմավարական գործընկերություններ են հաստատվել 

Նիդերլանդների, Լյուքսեմբուրգի, Գերմանիայի, Չինաստանի, Ղազախստանի հետ. 

«Մենք համառորեն, հետևողականորեն շարունակում ենք իրականացնել արտաքին հավասարակշռված և հավասարակշռման քաղաքականություն, և դա տալիս է

իր արդյունքները։ Այս տարի ռազմավարական գործընկերությունների շարքը համալրել են Ֆրանսիան, Բուլղարիան, Խորվաթիան, Լիտվան, Միացյալ Թագավորությունը»։

Հայաստանն առաջին անգամ ընտրվել է ՅՈՒՆԵՍԿՕ-ի Համաշխարհային ժառանգության կոմիտեի անդամ (2025-2029թթ. համար). «Այսպիսի բաների մասին սովորաբար առօրյայում քիչ է խոսվում, բայց սրանք նաև ցուցանիշներ են մեր միջազգային, բազմակողմ հարաբերություններում ակտիվության, հետաքրքրությունների և մեր նկատմամբ հետաքրքրությունների աճի մասով»։

 Հայաստանն առողջապահության համաշխարհային կազմակերպության Ծխախոտի դեմ պայքարի շրջանակային կոնվենցիայի կողմերի 11-րդ համաժողովի ընթացքում ընտրվել է հաջորդ Համաժողովը (COP12-ը) հյուրընկալող երկիր։

«Երևանյան երկխոսության» երկրորդ համաժողովի ցուցանիշները ևս տպավորիչ են.  «Մասնակցություն ունեցան 45-ից ավելի պետությունների, միջազգային կազմակերպությունների, փորձագիտական և ակադեմիական շրջանակների, խորհրդարանականների, ԶԼՄ-ների, տեխնոլոգիական ընկերությունների բարձրաստիճան ներկայացուցիչներ ու այլ հանրաճանաչ անձինք: Միջոցառումն ընդհանուր ունեցել է շուրջ 600 մասնակից: Բարձրաստիճան սեգմենտը ներառում էր 16 երկրի և միջազգային կազմակերպության ներկայացուցիչ, տեղի է ունեցել 27 պանելային քննարկում և 50-ից ավել երկկողմ հանդիպում»։

 Հայաստանում և արտերկրում այս տարի կայանալիք COP17-ի շրջանակներում կազմակերպվել են բազմաթիվ միջոցառումներ։

Միջազգային հարաբերությունների և դիվանագիտության ոլորտում մասնագետների պատրաստման և վերապատրաստման շրջանակներում դիվանագիտական դպրոցը բազմաթիվ ծրագրեր է իրականացրել ոչ միայն հայաստանցիների, այլև բազմաթիվ այլ երկրների քաղաքացիների համար։

 Բրյուսելում ՀՀ դեսպանության նոր շենքի ձեռքբերում. «Ներկայիս շինությանը և այս շենքի ձեռքբերումն ու տարածքի ընդլայնումը պայմանավորված էր Հայաստանի Հանրապետության և Եվրոպական միության միջև հարաբերությունների կտրուկ խորացմամբ»։

 Դիվանագիտական հարաբերությունների հաստատում

 «2025թ. դիվանագիտական հարաբերություններ են հաստատվել երեք երկրների հետ` Լեսոթո, Սողոմոնյան կղզիներ և Պակիստան։ Կհիշեք՝ այդ երկար չարչրկված, լուծում պահանջող հարցը՝ Հայաստանի և Պակիստանի միջև հարաբերությունների բացակայությունը: Եվ ահա՝ 2025թ. մեզ հաջողվեց համաձայնության գալ, և շատ հանդիսավոր պայմաններում ես և իմ պակիստանցի գործընկերը ստորագրեցինք համապատասխան փաստաթղթեր և միմյանց միջև դիվանագիտական հարաբերություններ հաստատեցինք»։

2025թ. ստորագրվել է 127 պայմանագիր, ուժի մեջ է մտել 68-ը: