Թրամփը հայտարարել է Իրանի հետ համաձայնության մոտ լինելու մասին

ԱՄՆ նախագահ Դոնալդ Թրամփը հայտարարել է, որ Իրանի հետ համաձայնագիրը կարող է ստորագրվել արդեն առաջիկա օրերին՝ հնարավոր է նույնիսկ այս շաբաթավերջին։ Այդ մասին հայտնում է Reuters-ը։ Միաժամանակ Թեհրանում ընդգծել են, որ վերջնական որոշում դեռևս չի ընդունվել։

Թրամփի խոսքով՝ Վաշինգտոնը զգալի առաջընթաց է արձանագրել բանակցություններում, և համաձայնության ստորագրումից հետո նախատեսվում է պաշտոնապես վերականգնել Հորմուզի նեղուցով նավարկությունը։ Նա նաև նշել է, որ համաձայնագրի ստորագրմանը կարող է մասնակցել ԱՄՆ փոխնախագահ Ջեյ Դի Վենսը։ Միևնույն ժամանակ Իրանի արտաքին քաղաքական գերատեսչությունը հայտարարել է, որ փաստաթղթի զգալի հատվածներն արդեն համաձայնեցվել են, սակայն Թեհրանը չի պատրաստվում զիջել իր հիմնական դիրքորոշումները։

Չնայած բանակցային լավատեսությանը՝ տարածաշրջանում լարվածությունը պահպանվում է։ Ըստ հրապարակման՝ ամերիկյան ուժերը խոցել են երկու իրանական հարձակողական անօդաչու սարք, իսկ իրանական կողմը հայտնել է Հորմուզի նեղուցով անցնող նավերի նկատմամբ վերահսկողության գործողությունների մասին։ Այդ ֆոնին համաշխարհային շուկաներում արձանագրվել է նավթի գների անկում և բաժնետոմսերի աճ՝ հնարավոր խաղաղ կարգավորման սպասումների պայմաններում։

Թրամփը կրկին ընդգծել է, որ ցանկացած համաձայնության առանցքային պայմանը Իրանի կողմից միջուկային զենքի մշակումից կամ ձեռքբերումից հրաժարվելն է։ Իրանը, իր հերթին, շարունակում է պնդել, որ իր միջուկային ծրագիրը խաղաղ բնույթ ունի և պահանջում է պատժամիջոցների մեղմացում ու սառեցված ակտիվների հասանելիություն։