Ուկրաինան Եվրոպայից լրացուցիչ միլիարդավոր դոլարների աջակցություն է խնդրում

Ուկրաինան մտադիր է եվրոպացի գործընկերներից լրացուցիչ 20 միլիարդ դոլարի աջակցություն խնդրել՝ պաշտպանական կարողությունների և ռազմական ծրագրերի ընդլայնման նպատակով։ Այդ մասին Politico-ին հայտնել է երկրի պաշտպանության նախարարության բարձրաստիճան ներկայացուցիչը։

Հրապարակման համաձայն՝ Կիևը նախատեսում է համապատասխան հարցը բարձրացնել հունիսի 18-ին նախատեսված «Ռամշտայն» ձևաչափով հանդիպման ընթացքում։ Նշվում է, որ հնարավոր ֆինանսավորումը նախատեսվում է ուղղել հակաօդային պաշտպանության համակարգերի ամրապնդմանը, PURL ծրագրում մասնակցության ընդլայնմանը, ինչպես նաև անօդաչու սարքերի, զինամթերքի, ռադիոէլեկտրոնային պայքարի միջոցների, հեռահար ազդեցության համակարգերի ձեռքբերմանը և ուկրաինական պաշտպանական ընկերություններից ուղղակի գնումներին։

Politico-ն նշում է, որ Կիևը նախատեսում է շարունակել ռազմական ներուժի զարգացումն ու խորքային գործողությունների հնարավորությունների ընդլայնումը։ Ավելի վաղ Ուկրաինայի արտաքին գործերի նախարարության ներկայացուցիչ Գեորգի Տիխին հայտարարել էր, որ երկիրը կարող է ստանալ նաև ամերիկյան Patriot հակաօդային պաշտպանության համակարգերի համար նախատեսված հրթիռներ, այդ թվում՝ պիտանելիության ժամկետին մոտեցող խմբաքանակներից։

Նախկինում նախագահ Վլադիմիր Զելենսկին նույնպես նշել էր, որ Ուկրաինան ԱՄՆ-ից չի ստացել այնպիսի ծավալի աջակցություն, ինչպիսին տրամադրվել է Մերձավոր Արևելքի տարածաշրջանին։