ՆԳ նախարարն Ազգային ժողովում ներկայացրել է տրանսպորտային միջոցը վարելու իրավունքի վերականգնման նոր մոդելը

ՆԳ նախարար Արփինե Սարգսյանն ԱԺ պաշտպանության և անվտանգության հարցերի մշտական հանձնաժողովի հերթական նիստում ներկայացրել է «Ճանապարհային երթևեկության անվտանգության ապահովման մասին» օրենքում փոփոխություն և լրացումներ կատարելու մասին» օրենքի և հարակից օրենքների նախագծերը։

Նախագծերի ընդունմամբ ակնկալվում է ներդնել վարելու իրավունքի վերականգնման նոր՝ առավել թիրախային մոդել՝ հիմնված վարելու իրավունքից զրկված անձանց վարքագծի փոփոխության և դրա նկատմամբ պատշաճ վերահսկողության վրա։

Նախարար Սարգսյանը նշել է, որ քննարկման ներկայացված օրենսդրական նախաձեռնության հիմքում քաղաքացիների առաջարկներն են։ Ըստ այդմ՝ առաջարկվում է օրենսդրական բալանսավորված լուծում։

Նոր ընթացակարգով նախատեսվում է՝

1) վարելու իրավունքից զրկելու մասին ոստիկանության՝ ուժի մեջ մտած ակտի հիմքով դադարեցված ՀՀ իրավասու մարմինների կողմից տրված վարելու իրավունքը՝ զրկման ժամկետը լրանալուց հետո 1 տարվա ընթացում դիմելու դեպքում, մեկ անգամ վերականգնել առանց որակավորման քննություններ հանձնելու՝ օրենքով սահմանված պետական տուրքի վճարմամբ, և սահմանել փորձաշրջան՝ 1 տարի ժամկետով, իսկ երկրորդ կամ հաջորդ անգամ՝ վերականգնել որակավորման քննություններ հանձնելուց հետո,

2) փորձաշրջան սահմանվելու դեպքում 13 միավորի փոխարեն հատկացնել 6 միավոր,

3) փորձաշրջանում գտնվող անձի կողմից 6 տուգանային միավորը սպառելու դեպքում նախատեսել տրանսպորտային միջոցներ վարելու իրավունքից զրկում մեկ տարի ժամկետով,

4) վարելու իրավունքից զրկված անձի վարելու իրավունքը զրկման ժամկետի ավարտից հետո առանց որակավորման քննությունների վերականգնելու և փորձաշրջան սահմանելու համար սահմանել պետական տուրք՝ հիսուն հազար դրամի չափով:

Միաժամանակ, սահմանվում է անցումային դրույթ, որով 2020 թ. հունվարի 1-ից հետո զրկված անձինք միայն մեկ անգամ կկարողանան վերականգնել իրենց վարելու իրավունքը առանց որակավորման քննությունների, համապատասխան պետական տուրքի վճարմամբ և 13 միավորի փոխարեն 6 տուգանային միավորի հատկացմամբ՝ 1 տարի փորձաշրջանով։

Նախարար Սարգսյանն ընդգծել է, որ երկրորդ և հաջորդ անգամ զրկվելու դեպքում, բնականաբար, վերականգնման ռեժիմը կիրականացվի բացառապես քննությունների եղանակով։

«Այսինքն մեթոդը հետևյալն է՝ կարճ ժամանակահատվածում ֆիքսում ենք փորձաշրջան, փորձաշրջանի ժամանակահատվածում տալիս ենք սահմանափակ թվով բալեր, եթե հետագայում վարորդն ապացուցում է, որ ունակ է լավ վարելու, ապա այդ ժամանակահատվածն անցնելուց հետո վերադառնում է 13 բալային համակարգի»,-ասել է ՆԳ նախարարը։

Նախարար Սարգսյանը կրկին հիշեցրել է, որ որոշումը չի տարածվելու ՀՀ դատարանների կամ օտարերկրյա պետությունների իրավասու մարմինների կողմից զրկումներին, անձին անգործունակ ճանաչելու մասին՝ դատարանի օրինական ուժի մեջ մտած վճռին, ինչպես նաև թմրամիջոցների, հոգեկան, հեգեմետ, հոգեներգործուն նյութերի օգտագործումով պայմանավորված, հիվանդությունների վերաբերյալ կամ առողջական վիճակով պայմանավորված դեպքերին առնչվող՝ վարելու իրավունքից զրկման որոշումներին:

Արփինե Սարգսյանը պատասխանել է նաև պատգամավորների հարցերին։

Հանձնաժողովը որոշում է կայացրել հարցը ներառել առաջիկա նիստի օրակարգում և այն քննարկել 24-ժամյա ընթացակարգով։