«Անկախ դիտորդը» կոչ է անում 3 տեղամասերի ընտրողներին պաշտպանել իրենց ընտրական իրավունքը

«Անկախ դիտորդ» դաշինքը կոչ է անում Երևան քաղաքի Նուբարաշեն վարչական շրջանի 10/51, Արտաշատ համայնքի Աբովյան գյուղի 12/13, Մեղրի համայնքի Ագարակ քաղաքի 35/65 տեղամասերի ընտրողներին առանց վարանելու պաշտպանել իրենց ընտրական իրավունքը։

Դաշինքի տարածած հաղորդագրության մեջ, մասնավորապես, ասվում է. «Անկախ դիտորդ դաշինքը, ելնելով ՀՀ Սահմանադրության, Ընտրական օրենսգրքի, Մարդու իրավունքների Եվրոպական կոնվենցիայի, ՄԻԵԴ-ի նախադեպային որոշումների ուսումնասիրությունից, գտնում է, որ 10/51, 12/13 և 35/65 տեղամասերում հունիսի 7-ին Ընտրական օրենսգրքի կարգավորումներին համապատասխան քվեարկություն իրականացրած ընտրողների իրավունքները խախտված են։

Այդ տեղամասերում վերաքվեարկություն չնշանակելով Կենտրոնական ընտրական հանձնաժողովը բացառել է իշխանություն ձևավորելուն մասնակցելու նրանց իրավունքը»։

Հիշեցնենք, որ ԿԸՀ–ն այս երեք տեղամասերում ընտրությունների արդյունքներն անվավեր է ճանաչել, սակայն վերաքվեարկության մասին որոշում չի կայացրել։

Հատկանշական է, որ եթե այս տեղամասերում վերաքվարկություններ տեղի ունենային, ապա ԲՀԿ–ն շատ մեծ հավանականությամբ կհաղթահարեր 4 տոկոսի արգելքը և կհայտնվեր նոր խորհրդարանում։