Պարեկները հայտնաբերել են վթարային իրավիճակներ ստեղծած BYD-ի վարորդին

Այսօր՝ հունիսի 27-ին, ՀՀ Ներքին գործերի նախարարության ոստիկանության Պարեկային ծառայության Կոտայքի մարզի գումարտակի հրամանատար Ալբերտ Մարտիրոսյանի հանձնարարականով՝ գումարտակի ծառայության ավագ տեսուչ, օրվա պատասխանատու Արտակ Ասատրյանի և գումարտակի ծառայության տեսուչ Կառլեն Բաղյանի գլխավորությամբ պարեկները հայտնաբերել և ՊԾ Կոտայքի մարզի գումարտակի հատուկ պահպանվող տարածք են տեղափոխել BYD մակնիշի ավտոմեքենան։

Ինչպես հայտնում է ֆոտոլրագրող Գագիկ Շամշյանը, ՊԾ Կոտայքի մարզի գումարտակի պարեկները հերթական օպերատիվ տեղեկություններն են ստացել, որ նշված ավտոմեքենան երեկ՝ հունիսի 26-ին, Զովունի-Եղվարդ ավտոճանապարհին վտանգավոր իրավիճակներ է ստեղծել քաղաքացիների ու մյուս ավտոմեքենաների վարորդների համար, ստեղծել նաև վթարային իրավիճակ։

Պարեկները տաք հետքերով պարզում են նշված ավտոմեքենայի մակնիշը, համարանիշը, ու ժամերի ընթացքում հայտնաբերում։

Ֆոտոլրագրողի տեղեկություններով՝ վարորդը Երևանի բնակիչ 37-ամյա Հայկ Մ.-ն է, ում նկատմամբ ճանապարհային երթևեկության կանոնները խախտելու համար պարեկի կողմից կազմվել է վարչական ակտ։

Գ. Շամշյանի տեղեկություններով՝ պարեկները ձեռք են բերել նաև նրա կողմից չարամտորեն երթևեկության կանոնները խախտելու տեսանյութը, որը ներկայացնում ենք ընթերցողներին։