Բժիշկները նշել են կյանքը երկարացնելու հինգ անարդյունավետ միջոց։

Կանխարգելիչ բժշկությամբ զբաղվող բժիշկներ Հյու Քոյնը, Մոհամեդ Էնայաթը և Միկա Էնգելը հայտարարել են, որ երիտասարդացման և երկարակեցության համար լայնորեն գովազդվող մի շարք միջոցներ չունեն գիտականորեն ապացուցված արդյունավետություն։ Նրանց գնահատականները հրապարակել է Marie Claire-ը։

Մասնագետների խոսքով՝ կասկածելի արդյունավետություն ունեն NAD+-ի մակարդակը բարձրացնող հավելումները, երիտասարդացման նպատակով օգտագործվող կենսաբանական ակտիվ հավելումների մեծ մասը, ներերակային վիտամինային կաթիլային ներարկումները, որոշ պեպտիդների ներարկումները, ինչպես նաև առողջության ցուցանիշների մշտական վերահսկման սարքերի նկատմամբ չափազանց մեծ հետաքրքրվածությունը։ Բժիշկները նշում են, որ այս միջոցները լայնորեն գովազդվում են, սակայն դրանց՝ կյանքի տևողությունը երկարացնելու կամ առողջությունը բարելավելու ազդեցությունը դեռևս գիտականորեն ապացուցված չէ։

Մասնագետների կարծիքով՝ առողջ և երկար կյանք ապահովելու լավագույն միջոցները շարունակում են մնալ կանոնավոր ֆիզիկական ակտիվությունը, ուժային մարզումները, բավարար քունը, հավասարակշռված սննդակարգը, սթրեսի վերահսկումը և ակտիվ սոցիալական կյանքը։ Նրանք ընդգծում են, որ նույնիսկ ամենաթանկ հավելումները չեն կարող փոխարինել առողջ ապրելակերպին։