Գիտնականները բացահայտել են ամենօրյա նախաճաշի անսպասելի օգտակար ազդեցությունը

Ամենօրյա նախաճաշը կարող է ոչ միայն բարելավել ինքնազգացողությունը, այլև նվազեցնել դեռահասների շրջանում դեպրեսիայի ախտանիշների առաջացման ռիսկը։ Այս եզրակացությանն են եկել չինացի գիտնականները, որոնց հետազոտության արդյունքները հրապարակվել են Nutrients գիտական ամսագրում։

Հետազոտությանը մասնակցել է 2502 դպրոցական Շանհայից։ Մասնագետները շուրջ 18 ամիս հետևել են նրանց նախաճաշելու սովորություններին, քնի տևողությանը և հոգեկան առողջությանը։

Արդյունքները ցույց են տվել, որ ամեն օր նախաճաշող դեռահասների մոտ հետագայում ավելի հազվադեպ են զարգացել դեպրեսիայի ախտանիշներ, ինչպես նաև նրանք միջինում ավելի երկար են քնել։

Գիտնականները պարզել են նաև, որ քնի պակասն ու դեպրեսիայի ախտանիշները փոխադարձաբար ուժեղացնում են միմյանց․ քիչ քունը մեծացնում է հոգեկան խնդիրների հավանականությունը, իսկ դեպրեսիան հետագայում հանգեցնում է քնի տևողության կրճատման։

Հետազոտության հեղինակների կարծիքով՝ նախաճաշի դրական ազդեցությունը կարող է պայմանավորված լինել ինչպես ուղեղի աշխատանքի համար կարևոր սննդանյութերով, այնպես էլ օրգանիզմի կենսաբանական ռիթմերի պահպանմամբ։