Հայաստանը «ՄԱԿ80» նախաձեռնության շրջանակում հանդես է եկել մանդատների կատարելագործման առաջարկներով

«ՄԱԿ80» նախաձեռնության շրջանակներում մանդատների կիրարկման վերանայման աշխատանքային խմբի հանդիպմանը ՄԱԿ-ում ՀՀ մշտական ներկայացուցիչ Պարույր Հովհաննիսյանն հանդես եկավ ելույթով և անդրադարձավ ՄԱԿ Գլխավոր քարտուղարի զեկույցների վերանայմանը, ինչպես նաև մանդատների բարելավման վերաբերյալ քարտուղարության կողմից ներկայացված առաջարկություններին։

Դեսպան Հովհաննիսյանը վերահաստատեց ՀՀ հանձնարությունը՝ նպաստելու կազմակերպության արդյունավետության բարձրացմանը՝ միաժամանակ պահպանելով անդամ երկրների կողմից տրված մանդատներին համապատասխան անաչառ, օբյեկտիվ ու փաստերի վրա հիմնված Գլխավոր քարտուղարի զեկույցների ներկայացման կարևորությունը։

Ընդգծվեց, որ մանդատների արդյունավետ իրականացումը սկսվում է դրանց արդյունավետ ձևակերպումից։ Արդյունավետությունը պետք է արտացոլվի ոչ միայն մանդատների բովանդակության, այլև Կազմակերպության աշխատանքի կազմակերպման եղանակի մեջ։ Սա ենթադրում է առավել հակիրճ և մատչելի փաստաթղթերի պատրաստում, տեքստերի ավելի գիտակցված մշակում, ինչպես նաև բանակցությունների կենտրոնացում բովանդակային հարցերի վրա՝ խուսափելով կրկնվող բնույթի առաջարկություններից։ Այս մոտեցումը հնարավորություն կտա Կազմակերպությանը առավել արդյունավետ օգտագործել իր սահմանափակ ժամանակն ու ռեսուրսները և ավելի արդյունավետ կատարել անդամ պետությունների կողմից իրեն վերապահված մանդատները։