ՖԻՖԱ-ն կարգապահական վարույթ է սկսել Արգենտինայի հավաքականի նկատմամբ

ՖԻՖԱ-ն հաստատել է, որ կարգապահական հետաքննություն է սկսել Արգենտինայի հավաքականի նկատմամբ՝ աշխարհի առաջնության կիսաեզրափակչում Անգլիայի նկատմամբ 2:1 հաշվով հաղթանակից հետո խաղադաշտում ցուցադրված «Մալվինյան կղզիները Արգենտինայինն են» գրությամբ պաստառի պատճառով։

ՖԻՖԱ-ի անկախ կարգապահական կոմիտեն ուսումնասիրում է հանդիպման պաշտոնական զեկույցները՝ որոշելու, թե արդյոք կիրառվելու են պատժամիջոցներ։ Կազմակերպության կարգապահական կանոնակարգով խաղադաշտում քաղաքական բնույթի ցուցադրություններն արգելվում են։

Հանդիպումից առաջ մարզադաշտի անվտանգության ծառայությունը հրահանգ էր ստացել թույլ չտալ երկրպագուներին ներս մտնել Ֆոլքլենդյան (Մալվինյան) պատերազմի կամ դրա հետ կապված սադրիչ գրություններով պաստառներով։

ՖԻՖԱ-ի կանոնակարգով Արգենտինայի ֆուտբոլի ասոցիացիայի նկատմամբ կարող են կիրառվել նախազգուշացում կամ պաշտոնական նկատողություն, դրամական տուգանք, մրցանակային գումարի վերադարձի պարտավորություն,  բացառիկ դեպքերում՝ նույնիսկ տիտղոսի զրկում։ 

Առաջին նման խախտման դեպքում նախատեսված են նաև ֆինանսական տուգանքներ, որոնք կրկնվելու դեպքում կարող են կրկնապատկվել։

Բացի այդ, ՖԻՖԱ-ն կարող է գնահատական տալ նաև Արգենտինայի երկրպագուների վարքագծին, որոնք Անգլիայի օրհներգի հնչելու ժամանակ վանկարկել են. «Եթե չես ցատկում, ուրեմն անգլիացի ես»՝ խոչընդոտելով օրհներգի հնչեցմանը։ Այդ խախտման համար ևս նախատեսված են դրամական տուգանքներ։