Ֆուտբոլը պատժում է, սա իսկական թրիլլեր էր․ Ելիմայի գլխավոր մարզիչ

Ղազախական «Ելիմայի» գլխավոր մարզիչ Անդրեյ Կարպովիչը մեկնաբանել է Կոնֆերենցիաների լիգայի որակավորման առաջին փուլում երևանյան «Ալաշկերտից» կրած պարտությունն ու պայքարը լքելը (երկու խաղերի արդյունքում՝ 3:3, իսկ 11-մետրանոցներով՝ 5:6)։

Sports.kz-ի փոխանցմամբ՝ ղազախ մասնագետը խոստովանել է, որ իսկական թրիլլերի ականատեսն են եղել, որտեղ իր թիմը չի կարողացել դիմակայել լարվածությանը։

«Նման խաղերից հետո դժվար է բառեր գտնել։ Ցավոք, չկարողացանք ուրախացնել մեր երկրպագուներին, ինչի համար ներողություն եմ խնդրում: Իսկական թրիլլեր ստացվեց, որում մենք չդիմացանք։ Այնուամենայնիվ, թիմի համար սա մեծ փորձ էր: Շնորհակալ եմ բոլոր նրանց, ովքեր ահռելի աշխատանք էին կատարել ստադիոնի սերտիֆիկացման ու այս ֆուտբոլային տոնը կազմակերպելու ուղղությամբ. մթնոլորտը հիասքանչ էր, բայց, ցավոք, ամեն ինչ վատ ավարտ ունեցավ մեզ համար»,- նշել է Կարպովիչը:

Խոսելով բուն հանդիպման և դրամատիկ հանգուցալուծման մասին՝ մարզիչն ընդգծել է, որ ֆուտբոլը չի ներում վրիպումները.

«Թվում էր՝ շատ քիչ էր մնացել վերջնարդյունքին, բայց ֆուտբոլը պատժում է: Շատ ցավալի գոլ բաց թողեցինք, որը դեռ երկար կհիշենք, դրան գումարվեց նաև 11-մետրանոց հարվածաշարը։ Չենք փնտրում մեղավորների, մեղավոր ենք բոլորս։ Որպես գլխավոր մարզիչ՝ ես կրում եմ ողջ պատասխանատվությունն ու պատրաստ եմ ցանկացած որոշման։ Ամենահեշտն այժմ ձեռքերը ծալելն ու մեկ ուրիշին մեղադրելն է»։

Չնայած ֆիզիկական ու հոգեբանական ծանր վիճակին՝ Կարպովիչը նշել է, որ թիմը պետք է արագ ուշքի գա՝ ներքին առաջնությունում հաջող հանդես գալու և հաջորդ մրցաշրջանում կրկին եվրագավաթներ վերադառնալու համար.

«Խաղը շատ էներգածախս էր և՛ ֆիզիկական, և՛ էմոցիոնալ առումով։ Բայց մենք պարտավոր ենք բարձրացնել գլուխներս, քանի որ առջևում Ղազախստանի առաջնության հանդիպումներն են։ Այսօր եվրագավաթային մրցաշրջանն ավարտվեց մեզ համար, բայց մենք պետք է անենք ամեն ինչ, որպեսզի «Ելիմայի» մասնակցությունը Եվրոպայում միանգամյա ակցիա չլինի, և մենք դառնանք եվրագավաթների մշտական մասնակից»։

Հիշեցնենք, որ սա «Ելիմայի» պատմության մեջ առաջին եվրագավաթային մրցաշրջանն էր։ Արդյունքում՝ Կոնֆերենցիաների լիգայի որակավորման երկրորդ փուլի ուղեգիր նվաճեց «Ալաշկերտը»։

«Ալաշկերտը» որակավորման երկրորդ փուլում կմրցի ռումինական «Կլուժի» հետ։ Առաջին հանդիպումը կկայանա Երևանում՝ հուլիսի 23-ին, պատասխան հանդիպումը՝ Ռումինիայում, հուլիսի 30-ին։