«Դատարկ ու շինծու իրավական ֆարս». Աբովյանը՝ Ծառուկյանի մեղադրանքի մասին

ԲՀԿ անդամ, ԱԺ նախկին պատգամավոր Արման Աբովյանը Քննչական կոմիտեի ստորաբաժանման դիմաց լրագրողների հետ զրույցում Գագիկ Ծառուկյանի վերաբերյալ հարուցված գործն անվանել է «քաղաքական դրդապատճառներով պայմանավորված իրավական ֆարս»։

Նրա խոսքով՝ տեղի ունեցողը դասական քաղաքական հետապնդում է և որևէ իրավական հիմնավորում չունի։

«Քրեական գործի վերաբերյալ մամուլում հրապարակված տեղեկություններին նույնիսկ մակերեսային ծանոթանալուց հետո ակնհայտ է դառնում, որ այս տրամաբանությամբ պարոն Ծառուկյանը պետք է ոչ թե մեղադրյալի, այլ տուժողի կարգավիճակ ունենա, քանի որ խոսքը նոր երևույթի մասին չէ»,- նշել է Աբովյանը։

Նա հիշեցրել է, որ նույն գործի շրջանակում նախկինում Իրանում իրականացվել են իրավական գործընթացներ, և իրանական դատարանը հանգել է այն եզրակացության, որ Գագիկ Ծառուկյանի նկատմամբ են կատարվել խարդախ գործողություններ և իրավախախտումներ։

Աբովյանի գնահատմամբ՝ գործը զուրկ է բավարար իրավական հիմքերից, իսկ դրա շուրջ ընթացող գործընթացները քաղաքական ենթատեքստ ունեն։

«Արդարությունը կարող է ուշանալ, բայց վերջում այն միշտ հաղթում է»,- ընդգծել է նա։