Վարդևանյան․ «Նարեկ Կարապետյանի հարցով քաղաքական թատրոն է բեմադրվում»

«Երեկ մենք ականատես եղանք մի իրավիճակի, որը, որքան հիշում եմ, Հայաստանի Հանրապետությունում նախկինում չի եղել։ ԿԸՀ-ն արձանագրում է, որ պատգամավորի թեկնածուն արդեն ստացել է պատգամավորի կարգավիճակ, սակայն այդ պայմաններում շարունակում է քննարկել նրա նկատմամբ քրեական հետապնդում հարուցելու համաձայնություն տալու վերաբերյալ միջնորդությունը»,- ԿԸՀ-ի դիմաց լրագրողների հետ զրույցում հայտարարեց «Ուժեղ Հայաստան» կուսակցության ներկայացուցիչ, փաստաբան Արամ Վարդևանյանը։

Հիշեցնենք, որ ԿԸՀ-ն արտահերթ նիստում քննարկել է դատախազության միջնորդությունը՝ «Ուժեղ Հայաստան» կուսակցության խորհրդի անդամ Նարեկ Կարապետյանի նկատմամբ քրեական հետապնդում հարուցելու վերաբերյալ։

Վարդևանյանը հիշեցրեց, որ 2021 թվականի հունիսին ՀՀ դատախազությունը նմանատիպ միջնորդություն էր ներկայացրել Ազգային ժողովի պատգամավոր Իշխան Զաքարյանի նկատմամբ քրեական հետապնդում հարուցելու համար։ Նրա խոսքով՝ այն ժամանակ, երբ արդեն հրապարակվել էր Սահմանադրական դատարանի որոշումը, ԿԸՀ-ն վերադարձրել էր միջնորդությունը։ Նույն կերպ, ըստ նրա, 2026 թվականի հունիսին ԿԸՀ-ն վերադարձրել էր նաև Նարեկ Կարապետյանի վերաբերյալ ներկայացված միջնորդությունը։

«Ի՞նչ տեղի ունեցավ հետո։ 2021 թվականին դատախազությունն այլևս Իշխան Զաքարյանի գործով նոր միջնորդություն չներկայացրեց։ Սակայն 2026 թվականին իրավիճակը փոխվեց․ նույն դատախազությունը, ԿԸՀ-ի կողմից միջնորդությունը վերադարձվելուց հետո, կրկին ներկայացրեց այն։ Ընդ որում, միջնորդությունը ներկայացվել է հուլիսի 13-ին, և դրա բովանդակությունից տպավորություն է ստեղծվում, թե դատախազությունը որոշ չափով շփոթել է ԿԸՀ-ի և վարչական դատարանների լիազորությունները»,- նշեց Վարդևանյանը։

Նրա խոսքով՝ դատախազությունն ակնկալել է, որ ԿԸՀ-ն կվերանայի իր նախկին դիրքորոշումը։

«Եվ, փաստորեն, այդպես էլ եղավ։ ԿԸՀ-ն այս անգամ ոչ թե անմիջապես վերադարձրեց միջնորդությունը, այլ սկսեց դրա բովանդակային քննությունը։ Մեզ համար սա քաղաքական գործընթաց է, որը նպատակ ունի միջամտել Նարեկ Կարապետյանի քաղաքական և խորհրդարանական գործունեությանը։ Հատկանշական է, որ մոտ մեկ ամիս առաջ նույն հարցի վերաբերյալ ԿԸՀ-ն ուներ մեկ դիրքորոշում, իսկ այսօր՝ բոլորովին այլ։ Իսկ դրան նախորդել էր Նարեկ Կարապետյանի քաղաքական ակտիվության աճը»,- ասաց Վարդևանյանը։