«Միասնության թևեր»-ի օգտին քվեարկելու դիմաց 40 հազար դրամ օգնություն են խոստացել․ գործը դատարանում է

Դատախազը հաստատված մեղադրական եզրակացությամբ Հակակոռուպցիոն դատարան է ուղարկել «Միասնության թևեր» կուսակցության օգտին քվեարկելու պայմանով ընտրակաշառք տալու և ստանալու վերաբերյալ քրեական վարույթի նյութերը։

Հակակոռուպցիոն կոմիտեում քննված վարույթով պարզվել է, որ Սյունիքի մարզի Կապան համայնքի Արծվանիկ բնակավայրի նախկին վարչական ղեկավար Ա.Հ.-ն 2026 թվականի հունիսի 7-ին նշանակված Ազգային ժողովի հերթական ընտրություններին «Միասնության թևեր» կուսակցության օգտին քվեարկելու դիմաց Ալ.Հ.-ին խոստացել է ընդգրկել ՓԲ ընկերության կողմից բնակիչների որոշ խմբերին տրամադրվող ամսական 40 հազար դրամ օգնության ցուցակում։

Դատախազը հանրային քրեական հետապնդում է հարուցել նախկին պաշտոնյայի և քաղաքացու նկատմամբ՝ համապատասխանաբար ընտրակաշառք տալու և ընտրակաշառք ստանալու մեղադրանքով։ Հուլիսի 22-ին քրեական վարույթի նյութերը հանձնվել են Հակակոռուպցիոն դատարան։