Մասնագետը նշել է՝ ինչու է սմուզին ավելի օգտակար, քան հյութը

Դեղագործական գիտությունների թեկնածու, ֆիտոքիմիայի մասնագետ Իգոր Սոկոլսկու խոսքով՝ սմուզին կարող է համարվել լիարժեք միջանկյալ սնունդ, մինչդեռ թարմ քամած հյութը հիմնականում շաքար պարունակող հեղուկ է։ Այդ մասին նա խոսել է aif.ru-ի հետ զրույցում։

Մասնագետը պարզաբանել է, որ սմուզի պատրաստելիս օգտագործվում է ամբողջ պտուղը, ինչի շնորհիվ պահպանվում են սննդային մանրաթելերը, վիտամիններն ու մյուս օգտակար նյութերը։ Բլենդերը մանրացնում է բջջանյութը, սակայն չի հեռացնում այն, ինչի արդյունքում սմուզին դառնում է հագեցնող և ավելի սննդարար։

Սոկոլսկու խոսքով՝ թարմ քամած հյութում մանրաթելերի բացակայության պատճառով մրգային շաքարը շատ արագ է ներծծվում արյան մեջ՝ առաջացնելով արյան շաքարի և ինսուլինի մակարդակի կտրուկ բարձրացում։ Իսկ սմուզիում բջջանյութը դանդաղեցնում է շաքարների յուրացումը, ապահովում ավելի կայուն էներգիա և երկար ժամանակ պահպանում հագեցվածության զգացումը։