Հոգեբանը նշել է սմարթֆոնից կախվածության հիմնական նշանները

Հոգեբան Նիկոլաս Կարդարասը Yahoo-ին տված հարցազրույցում նշել է այն հիմնական նշանները, որոնք կարող են վկայել սմարթֆոնից կախվածության մասին։ Նրա խոսքով՝ նման խնդիր ունեցող մարդիկ հաճախ անհանգստություն կամ խուճապ են զգում, երբ հեռու են մնում հեռախոսից, մշտապես ցանկանում են ստուգել այն զրույցի ընթացքում կամ անմիջապես արթնանալուց հետո։

Մասնագետը նաև առանձնացրել է այսպես կոչված «ֆանտոմային թրթռման» երևույթը, երբ մարդուն թվում է, թե հեռախոսը զանգում կամ թրթռում է, մինչդեռ իրականում որևէ ծանուցում չի եղել։ Կարդարասի կարծիքով՝ կախվածության մասին կարող է վկայել նաև արհեստական բանականության չաթբոտների նկատմամբ չափազանց մեծ վստահությունը, որը, նրա խոսքով, կարող է թուլացնել ինքնուրույն մտածելու կարողությունը։

Կախվածությունը նվազեցնելու համար հոգեբանը խորհուրդ է տվել շաբաթվա ընթացքում գոնե մեկ օր ամբողջությամբ հրաժարվել հեռախոսի օգտագործումից, ավելի շատ ժամանակ անցկացնել դրսում, շփվել մտերիմների հետ և զբաղվել այնպիսի գործունեությամբ, որը բնական կերպով խթանում է դրական զգացողությունների առաջացումը։