Սննդաբանը նշել է սրտի համար ամենաօգտակար ձկնատեսակները

Ծովատառեխն ու սաղմոնը համարվում են սրտի առողջության համար ամենաօգտակար ձկնատեսակներից՝ օմեգա-3 ճարպաթթուների բարձր պարունակության շնորհիվ։ Այս մասին Tasting Table-ի հետ զրույցում հայտնել է սննդաբան Էնջել Լյուկը։

Մասնագետի խոսքով՝ 100 գրամ պատրաստված ծովատառեխը կամ սաղմոնը պարունակում է մոտ 2150 մգ օմեգա-3 ճարպաթթու։ Դրանցում առկա էյկոզապենտաենաթթուն (EPA) և դոկոզահեքսաենաթթուն (DHA) նպաստում են սրտանոթային հիվանդությունների, այդ թվում՝ ծայրամասային զարկերակների հիվանդությունների և կորոնար բարդությունների ռիսկի նվազեցմանը։

Օմեգա-3 ճարպաթթուները նաև օգնում են նվազեցնել օրգանիզմում բորբոքային գործընթացները։ Սննդաբանի խոսքով՝ օգտակար ճարպաթթուներով հարուստ են նաև սարդինան և սկումբրիան, թեև դրանց պարունակությունն ավելի ցածր է, քան սաղմոնի և ծովատառեխի դեպքում։