Հայաստանում 6 ամսում ընտանիքում բռնության 814 դեպք է գրանցվել

Հայաստանում այս տարվա առաջին վեց ամիսներին ընտանիքում բռնության 814 դեպք է արձանագրվել։ Ազգային վիճակագրական կոմիտեի տվյալների համաձայն՝ դեպքերի մեծ մասը գրանցվել է ամուսինների միջև։

341 դեպքում բռնությունը կատարվել է ամուսնու կողմից կնոջ նկատմամբ, 17 դեպքում՝ կնոջ կողմից ամուսնու նկատմամբ։ 48 դեպք արձանագրվել է ծնողի կողմից զավակի, իսկ 73-ը՝ զավակի կողմից ծնողի նկատմամբ։ Ընտանիքի այլ անդամների կողմից արձանագրվել է բռնության 190 դեպք։

Միաժամանակ, տարվա առաջին վեց ամիսներին բռնության է ենթարկվել 310 անչափահաս, որոնցից 161-ը՝ աղջիկներ։

Պաշտոնական վիճակագրության համաձայն՝ 90 անձ ենթարկվել է սեռական բռնության, 543-ը՝ ֆիզիկական ներգործության, իսկ 826-ը՝ հոգեբանական բռնության։