ԱՄՆ-ում հայտարարել են Abrams տանկի արդիականացման ներուժի սպառման մասին

ԱՄՆ բանակի՝ M1A2 Abrams հիմնական մարտական տանկի հետագա արդիականացումից հրաժարվելը վկայում է, որ ներկայիս հարթակի կատարելագործման հնարավորությունները գրեթե սպառվել են։ Այս մասին գրում է 19FortyFive պարբերականը։

2023 թվականին ԱՄՆ բանակը դադարեցրել էր M1A2 SEPv4 տարբերակի մշակումը՝ կենտրոնանալով նոր M1E3 տանկի նախագծի վրա։ Հրապարակման հեղինակի խոսքով՝ դա ոչ թե Abrams ծրագրից հրաժարում է, այլ ընդունում, որ գործող տանկն այլևս հնարավոր չէ անվերջ կատարելագործել՝ նոր սարքավորումներ ու զրահ ավելացնելով և շարունակաբար մեծացնելով դրա քաշը։

Ներկայիս M1A2 SEPv3 տարբերակի քաշը գերազանցում է 66 տոննան, իսկ SEPv4-ը նոր սարքավորումներով կարող էր ավելի ծանր լինել։ Հոդվածում նաև նշվում է, որ ժամանակակից մարտական գործողությունները ցույց են տվել՝ անօդաչու թռչող սարքերը կարող են խոցել նույնիսկ բարձր պաշտպանվածություն ունեցող զրահատեխնիկան, ինչի պատճառով գործող կառուցվածքի հետագա ծանրացումն ու արդիականացումը կորցնում են արդյունավետությունը։