Գաբրիելյանը՝ նոր պաշտոնի թեկնածու․ ինչ է նախատեսվում կրթության և գիտության ոլորտում

«Քաղաքացիական պայմանագիր» խմբակցությունը ԱԺ կրթության, գիտության, մշակույթի, սպորտի և սփյուռքի հարցերի մշտական հանձնաժողովի նախագահի պաշտոնում առաջադրել է Սիսակ Գաբրիելյանի թեկնածությունը։ Թեկնածությունը խորհրդարանում ներկայացրել է «Քաղաքացիական պայմանագիր» խմբակցության պատգամավոր Ալխաս Ղազարյանը։

Սիսակ Գաբրիելյանը ծնվել է 1988 թվականի սեպտեմբերի 19-ին Երևանում։ 2016 թվականին ավարտել է Երևանի պետական համալսարանի ժուռնալիստիկայի ֆակուլտետը, իսկ 2021 թվականին՝ ԵՊՀ իրավագիտության ֆակուլտետը։

Մասնագիտական գործունեությունը սկսել է լրագրության ոլորտում։ 2014 թվականի հունվարից սեպտեմբեր աշխատել է «Ա1+» հեռուստաընկերությունում՝ որպես լրագրող, իսկ 2014-2018 թվականներին եղել է «Ազատություն» ռադիոկայանի լրագրող և հեռուստառադիոհաղորդավար։

2019-2021 թվականներին Գաբրիելյանը «Իմ քայլը» դաշինքի համապետական ցուցակով ընտրվել է պատգամավոր և զբաղեցրել ԱԺ պետական-իրավական հարցերի մշտական հանձնաժողովի նախագահի պաշտոնը։ 2021 թվականին «Քաղաքացիական պայմանագիր» կուսակցության ցուցակով կրկին ընտրվել է պատգամավոր և ղեկավարել ԱԺ կրթության, գիտության, մշակույթի, սպորտի և սփյուռքի հարցերի մշտական հանձնաժողովը։

Ըստ ներկայացված տվյալների՝ 8-րդ գումարման Ազգային ժողովում Գաբրիելյանը եղել է օրենսդրական ամենաշատ նախաձեռնություններ ներկայացրած պատգամավորներից մեկը՝ հեղինակելով 34 օրենսդրական նախագիծ։

2007-2009 թվականներին ծառայել է ՀՀ զինված ուժերում։ 2008 թվականին պարգևատրվել է «Հայոց բանակի գերազանցիկ» կրծքանշանով։ Ամուսնացած է, ունի երկու երեխա։

Իր ելույթում Գաբրիելյանն անդրադարձել է կրթության ոլորտում իրականացվող ծրագրերին՝ նշելով, որ Հայաստանի անկախության տարիներին, ինչպես նաև դրանից առաջ՝ ընդհանուր առմամբ շուրջ 50 տարվա ընթացքում, կրթության ոլորտում նման ծավալի աշխատանք չի իրականացվել, ինչպիսին, իր գնահատմամբ, իրականացվել է 2021 թվականից մինչ օրս։

Նա առանձնացրել է «300 դպրոց, 500 մանկապարտեզ» ծրագիրը՝ որպես ոլորտում իրականացվող խոշոր նախաձեռնություններից մեկը։

Գաբրիելյանի խոսքով՝ առաջիկա հինգ տարիների ընթացքում նախատեսվում է օտարերկրյա ուսանողների թիվը Հայաստանում հասցնել շուրջ 15 հազարի, իսկ գիտության ֆինանսավորումը կրկնապատկել՝ այն հասցնելով ՀՆԱ-ի 1 տոկոսին։