«Հայաստանում տեղի ունեցող բռնաճնշումները և ապօրինությունները հայ տեսակի դեմ են»․ Տիգրան Աբրահամյան

Տիգրան Աբրահամյանը հայտարարել է, որ Հայաստանում տեղի ունեցող գործընթացները, իր գնահատմամբ, ուղղված են հայերի և ազգային խնդիրներով զբաղվող անհատների ու կառույցների դեմ։ ԱԺ «Պատիվ ունեմ» խմբակցության պատգամավորի խոսքով՝ տարբեր նպատակներով թիրախավորվում են նաև սփյուռքի կազմակերպություններն ու ազգային գործիչները։

Նա նշել է, որ իշխանությունների կողմից ճնշումների են ենթարկվում այն կառույցներն ու անձինք, որոնք զբաղվում են համազգային նշանակության հարցերով՝ Հայոց ցեղասպանության միջազգային ճանաչումից մինչև Արցախի խնդիրը և Հայ Առաքելական Եկեղեցու պաշտպանությունը։

Աբրահամյանի պնդմամբ՝ նման քաղաքականություն իրականացվում է ոչ միայն Հայաստանում, այլև արտերկրում գործող հայկական կառույցների և գործիչների նկատմամբ։

Պատգամավորը նաև նշել է, որ, իր գնահատմամբ, իշխանությունները փորձում են հարաբերություններում գոհացնել Բաքվին և Անկարային՝ ճնշումների ենթարկելով այն անհատներին ու կազմակերպություններին, որոնք իրենց գործունեությամբ կարող են դժգոհություն առաջացնել այդ երկրների մոտ։

«Հայաստանում տեղի ունեցող բռնաճնշումները, ապօրինությունները, բռնությունները հայ տեսակի դեմ են, և այդ տեսակը տարաբնույթ հետապնդումների է ենթարկվում ոչ միայն ներսում, այլև դրսում»,- գրել է Աբրահամյանը։