«Եթե ՔՊ-ի համակիր ես՝ իրավունքներ ունես, եթե ոչ՝ հալածյալ ես». Գրիգորյանի կոշտ ելույթը

«Հայաստան» խմբակցության ղեկավար Աննա Գրիգորյանը ԱԺ-ում ունեցած ելույթում կոշտ քննադատության է ենթարկել իշխանություններին՝ անդրադառնալով Բաքվում պահվող հայերին, անհետ կորածների խնդիրներին և Հայաստանում մարդու իրավունքների պաշտպանության վիճակին։

Նրա խոսքով՝ Բաքվի բանտերում հայտնված հայերի հարցում ստեղծված իրավիճակի պատասխանատվությունը կրում է Հայաստանի գործող իշխանությունը։

«Այս իշխանության և նրա ղեկավարի գործողությունների կամ անգործության հետևանքով են մեր հայրենակիցները հայտնվել Բաքվի բանտերում։ Չեմ խոսում անհետ կորածների ճակատագրի մասին, որի ուղղությամբ ընդհանրապես որևէ առաջընթաց չի արձանագրվել»,- ասել է Գրիգորյանը։

Նա ընդգծել է, որ իշխանությունը բավարար քայլեր չի ձեռնարկում՝ հայ գերիներին և մյուս պահվող անձանց հայրենիք վերադարձնելու ուղղությամբ։

Անդրադառնալով Հայաստանում մարդու իրավունքների պաշտպանության խնդրին՝ ընդդիմադիր պատգամավորը հարց է բարձրացրել, թե իշխանության օրոք իրականում ում իրավունքներն են պաշտպանվում։

«Նախ հարց է առաջանում՝ ո՞ր մարդու իրավունքները։ Եթե մարդը ՔՊ-ի համակիր է, նրա իրավունքները, ամենայն հավանականությամբ, պաշտպանված են կամ առնվազն չեն ոտնահարվում։ Բայց երբ նույն մարդը այլևս չի կիսում ՔՊ-ի հայացքները կամ ձայն չի տալիս իշխանությանը, նա անմիջապես վերածվում է քաղաքական հալածյալի»,- նշել է նա։

Գրիգորյանը նաև քննադատել է Նիկոլ Փաշինյանի՝ քաղաքացիներին ուղղված հրապարակային հայտարարությունները՝ դրանք հակադրելով իշխանության վերաբերմունքին իր ընդդիմախոսների նկատմամբ։

«Փաշինյանը կարող է կանգնել ամբիոնի մոտ և ասել՝ ես ձեզ սիրում եմ, խոնարհվում եմ ձեր առջև, բայց ակնհայտ է, որ այդ վերաբերմունքը վերաբերում է իր համակիրներին։ Իսկ երբ տեսնում է, որ մարդը իր համակիրը չէ, հնչում են բոլորովին այլ ձևակերպումներ՝ սպառնալիքներով և նվաստացնող արտահայտություններով»,- ասել է ընդդիմադիր պատգամավորը։

Նրա գնահատմամբ՝ իշխանության վերաբերմունքի հիմքում մարդկանց նկատմամբ ընտրովի մոտեցումն է․ «Եթե քո համակիրն է՝ սիրում ու խոնարհվում ես նրա առաջ, եթե քո համակիրը չէ՝ փորձում ես նրան գետնին փռել»։