Գործակալությունը հորդորում է չհրապարակել Երևանում հայտնաբերված նորածնի դեմքն ու նույնականացնող տվյալները

Անձնական տվյալների պաշտպանության գործակալությունը լրատվամիջոցներին, սոցիալական ցանցերի էջերին և այլ անձանց հորդորում է չտարածել Երևանում առանց ծնողական խնամքի հայտնաբերված նորածնի դեմքը բաց ցուցադրող լուսանկարներն ու տեսանյութերը, ինչպես նաև երեխային նույնականացնելու հնարավորություն տվող այլ տվյալներ։

Գործակալությունը նշում է, որ դեպքը մեծ հանրային հետաքրքրություն է առաջացրել, և դրա մասին հանրությանը տեղեկացնելն իրավաչափ է։ Սակայն հանրային հետաքրքրությունը չի վերացնում երեխայի անձնական տվյալների պաշտպանության պահանջները։

Գործակալության փոխանցմամբ՝ երեխայի լուսանկարն ու տեսապատկերը անձնական տվյալ են, իսկ նորածնի նման խոցելի իրավիճակում դրանց հրապարակումը պետք է գնահատվի՝ հաշվի առնելով երեխայի լավագույն շահը և համաչափության սկզբունքը։

Գործակալությունը նաև ընդգծում է, որ եթե երեխայի լուսանկարը կամ տեսանյութը նախկինում արդեն հրապարակվել է որևէ պետական մարմնի, բուժհաստատության կամ լրատվամիջոցի կողմից, դա չի նշանակում, որ այն կարելի է անսահմանափակ կերպով վերարտադրել և տարածել։ Յուրաքանչյուր հետագա հրապարակում ևս պետք է գնահատվի առանձին։

Գործակալությունը հորդորում է արդեն հրապարակված նյութերում անճանաչելի դարձնել երեխայի դեմքը և հեռացնել այն տվյալները, որոնց հրապարակումն անհրաժեշտ չէ դեպքի մասին հանրությանը տեղեկացնելու համար։ Յուրահատուկ զգուշություն է առաջարկվում նաև երեխայի ծնողների, ծագման և ընտանեկան հանգամանքների վերաբերյալ տեղեկություններ հրապարակելիս։