Լուսինե Բադալյանի թեկնածությունն առաջադրվել է ԱԺ առողջապահության հանձնաժողովի նախագահի պաշտոնում

«Քաղաքացիական պայմանագիր» խմբակցությունը Լուսինե Բադալյանի թեկնածությունն առաջադրել է ԱԺ առողջապահության հարցերի մշտական հանձնաժողովի նախագահի պաշտոնում։ Նրա թեկնածությունը խորհրդարանում ներկայացրել է ՔՊ խմբակցության պատգամավոր Տարոն Չախոյանը։

Լուսինե Բադալյանը 2003 թվականին ավարտել է Երևանի պետական համալսարանի պատմության ֆակուլտետի արվեստաբանության բաժինը՝ ստանալով հայ արվեստի պատմության տեսության մագիստրոսի աստիճան։ Հետագայում մասնակցել է մի շարք կրթական և մասնագիտական ծրագրերի Հայաստանում, Իտալիայում և ԱՄՆ-ում։ 2022 թվականին ավարտել է Մ. Հերացու անվան Երևանի պետական բժշկական համալսարանի «Բուժհաստատությունների կառավարում» մագիստրոսական ծրագիրը։

1997-2019 թվականներին աշխատել է ռադիոյում և հեռուստատեսությունում՝ որպես հաղորդավար։ Դասավանդել է նաև թիվ 61 միջնակարգ դպրոցում, ինչպես նաև ԵՊՀ «Մասս մեդիա» գիտակրթական կենտրոնում և «Աբելյան» արվեստի դպրոցում։

Բադալյանը մասնակցել է մի շարք սոցիալական, կրթական և գյուղատնտեսական ծրագրերի։ Նա եղել է «Գյուղատնտեսություն» ոլորտի տարբեր նախաձեռնությունների մասնակից, «Organic Ambassador EU» ծրագրի դեսպան, «Ֆոնդ 100» բարեգործական հիմնադրամի համահիմնադիր և հոգաբարձուների խորհրդի անդամ, ինչպես նաև «Ժպիտների քաղաք» բարեգործական հիմնադրամի հոգաբարձուների խորհրդի անդամ։

Քաղաքական գործունեությունը Լուսինե Բադալյանը սկսել է 2018 թվականին՝ դառնալով Երևանի ավագանու անդամ «Իմ քայլը» դաշինքի կազմում։ 2019-2021 թվականներին եղել է պատգամավոր «Իմ քայլը» դաշինքի համապետական ցուցակով, իսկ 2021-2026 թվականներին՝ «Քաղաքացիական պայմանագիր» խմբակցության պատգամավոր։ Այդ ընթացքում նա եղել է ԱԺ առողջապահության և սոցիալական հարցերի մշտական հանձնաժողովի անդամ։

Թեկնածության քննարկման ժամանակ Բադալյանը նշել է, որ նախորդ տարիներին ակտիվորեն ներգրավված է եղել հանձնաժողովի աշխատանքներում։ Նրա խոսքով՝ 7-րդ գումարման Ազգային ժողովում հանձնաժողովը քննարկել է 91 օրենսդրական նախագիծ, որոնցից 9-ի հեղինակը կամ համահեղինակն ինքն է եղել։ 8-րդ գումարման ընթացքում քննարկվել է 86 նախագիծ, որոնցից 19-ը՝ իր հեղինակությամբ։

Բադալյանը նաև անդրադարձել է առողջապահության ապահովագրության ներդրմանը։ Նրա խոսքով՝ 2018 թվականից հանձնաժողովի աշխատանքների շրջանակում ուսումնասիրվել է տարբեր երկրների փորձը, ինչի արդյունքում Հայաստանում ևս ներդրվել է առողջության համընդհանուր ապահովագրության համակարգը։

«Մեր նպատակն է հասնել առողջապահական ծառայությունների համընդհանուր հասանելիության, ապահովել քաղաքացիների համար միատեսակ ծառայություններից օգտվելու հնարավորություն՝ անկախ նրանց սոցիալական կարգավիճակից, ինչպես նաև նվազեցնել ընտանիքների կողմից բուժօգնության վրա կատարվող ծախսերը»,- հայտարարել է Բադալյանը։