Reuters․ Վաշինգտոնում տեղակայված հազարավոր զինվորականները հազվադեպ են միջամտում հանցագործություններին

ԱՄՆ նախագահ Դոնալդ Թրամփի որոշմամբ Վաշինգտոնում ներկայում տեղակայված է մոտ 4,500 Ազգային գվարդիայի զինծառայող, սակայն Reuters-ի ուսումնասիրության համաձայն՝ նրանց մասնակցությունը հանցագործությունների կանխմանն ու բացահայտմանը սահմանափակ է։ Մեկ տարվա ընթացքում գվարդիականները հիշատակվել են մայրաքաղաքում հարուցված քրեական գործերի ընդամենը մոտ 1.3%-ում։

Reuters-ը պարզել է, որ զինվորականները հիմնականում ներգրավվել են մանր իրավախախտումների դեպքերում՝ խանութներից գողություններ, մետրոյում առանց վճարելու անցնելու փորձեր և հասարակական կարգի խախտումներ։ Միևնույն ժամանակ, դատարանի փաստաթղթերում գրեթե չեն հանդիպում դեպքեր, երբ նրանք իրավապահ գործունեություն իրականացրած լինեն այն թաղամասերում, որտեղ վերջին հինգ տարիներին գրանցվել է Վաշինգտոնի սպանությունների շուրջ 82%-ը։

Թրամփի վարչակազմը Կոնգրեսին հայտնել է, որ նախատեսում է զինվորականների ներկայությունը Վաշինգտոնում շարունակել մինչև 2029 թվականը։ Ծրագրի ընդհանուր ծախսերը կարող են հասնել շուրջ 1.4 միլիարդ դոլարի։ Սպիտակ տունը, սակայն, պնդում է, որ ձեռնարկված միջոցառումները նպաստել են հանցավորության նվազմանը և մայրաքաղաքում կյանքի որակի բարելավմանը։