Փաշինյան․ «Գործադիրը հրաժարվեց դատական համակարգի վրա ազդեցությունից, իսկ այդ տեղը զբաղեցրին մաֆիոզ շրջանակները»

«2018-ին գործադիրը հրաժարվեց դատական իշխանության վրա ազդեցություն գործադրելու գործելակերպից, բայց այդ բացը զբաղեցրին մաֆիոզ շրջանակները»,- Ազգային ժողովում հայտարարեց վարչապետ Նիկոլ Փաշինյանը՝ պատասխանելով պատգամավոր Արայիկ Հարությունյանի հարցին։

Հարությունյանն իր խոսքում անդրադարձել էր ցանկացած իշխանության համար ինքնահայեցման կարևորությանը՝ նշելով, որ կառավարությունը պետք է հետևի հնչող քննադատություններին և անհրաժեշտության դեպքում լուծումներ տա առկա խնդիրներին, մասնավորապես՝ դատական համակարգում առկա խնդիրներին։

Փաշինյանի խոսքով՝ 2026 թվականի խորհրդարանական ընտրությունների քարոզարշավի ընթացքում իրեն ամենահաճախ տրվող հարցերից մեկն այն էր, թե ինչու որոշ անձինք մինչ օրս չեն դատապարտվել կամ շարունակում են ազատության մեջ մնալ։

«Ինձ համար դժվար է բացատրել, որ դրանք ինձ հասցեագրված հարցեր չեն։ Մենք դատաիրավական բարեփոխումների համար արել ենք առավելագույնը, բայց հիմա պարզվում է՝ այդ հարցերը հենց ինձ են հասցեագրված։ Սակայն խնդիրը միայն դա չէ։ Խնդիրն այն է, որ Հայաստանի Հանրապետության ժողովուրդը՝ որպես իշխանության կրող, ունի հարցեր, որոնց պատասխանը պետք է ստանա»,- ասաց վարչապետը։

Նա անդրադարձավ նաև քաղաքական հետապնդումների վերաբերյալ հնչող գնահատականներին՝ նշելով.

«Այսօր խոսում են քաղաքական հետապնդումների մասին, իսկ ես խոսում եմ քաղաքական չհետապնդումների մասին։ Ես չեմ կարող հավատալ, որ որոշ մարդիկ մինչև հիմա պատասխանատվությունից խուսափել են այն պատճառով, որ դատաիրավական համակարգն արդար է։ Ընդհակառակը՝ նրանք խուսափել են պատասխանատվությունից, որովհետև պահպանվել են կոռուպցիոն կապերը։ Մինչև 2018 թվականը ձևավորված հայտնի ընտանիքներ կան, որոնց անդամները դատավորներ են, որոշումներ են կայացնում, միմյանց հետ կապված են բարեկամական ու խնամիական հարաբերություններով»։

Վարչապետի խոսքով՝ այդ դատավորների մի մասը շարունակում է պաշտոնավարել, քանի որ գտնվում է սահմանադրական պաշտպանության ներքո։

«Քաղաքական իշխանությունը նրանց այդտեղից հեռացնելու օրինական հնարավորություն չունի»,- ընդգծեց Փաշինյանը։