Գեղամ Մանուկյան․ «Աղանդավորագույն մանիպուլյատոր պետք է լինես, որ բանակում զոհերի պատճառը խաղաղությունը համարես»
Քաղաքական
«Աղանդավորագույն մանիպուլյատոր կարող ես լինել, երբ մարտական հերթապահության ժամանակ խաղաղ պայմաններում զոհերի աղբյուրը համարես խաղաղությունը»,- լրագրողների հետ զրույցում հայտարարել է ԱԺ «Հայաստան» խմբակցության պատգամավոր Գեղամ Մանուկյանը՝ անդրադառնալով վարչապետ Նիկոլ Փաշինյանի՝ բանակում զոհերի պատճառների վերաբերյալ հայտարարություններին։
Հիշեցնենք, որ վարչապետը կառավարության ծրագրի ներկայացման ժամանակ նշել էր, թե բանակում տեղի ունեցող դեպքերի զգալի մասը կապված է ժամապահության ընթացքում քնելու խնդրի հետ։
«Երբ խաղաղություն չէր, ժամապահ զինվորն ինքն էլ մտավախություն ուներ, որ եթե քնի, իր ֆիզիկական անվտանգությունը կվտանգվի։ Հիմա գիտեն, որ դա չի լինելու կամ դրա հավանականությունը շատ փոքր է, սակայն շրջապատի և զորամասի վերաբերմունքը մնացել է նույնը»,- ասել էր Փաշինյանը՝ հավելելով, որ այդ խնդիրների լուծման ուղղությամբ կառավարությունը նախատեսում է կոնկրետ քայլեր։
Մանուկյանի խոսքով՝ նման քայլերը պետք է արվեին շատ ավելի վաղ։
«Վճռական քայլերը պետք է վաղուց արված լինեին։ Ութ տարի այդ քայլերը չեն արվել, և հիմա այդ ամենը կուտակված խնդիրների պայթյուն է առաջացնում»,- նշել է պատգամավորը։
Նա նաև անդրադարձել է բանակում գնդերեցների ինստիտուտի գործունեությանը՝ ընդգծելով, որ դրա սահմանափակումից հետո բացասական միտումներ են նկատվում։
«Սնոտիապաշտ չեմ, բայց տեսեք՝ իրար հաջորդող այս դեպքերը մեծ ծավալ ստացան բանակից գնդերեցների ինստիտուտի վերացումից հետո։ Բազմաթիվ սպաների՝ ոչ քաղաքականապես հուսալի կամ իշխանությունների համար «յուրային» չհամարվող կադրերի հեռացումը հանգեցրել է լուրջ կադրային խնդիրների»,- ասել է Մանուկյանը։
Պատգամավորը քննադատել է նաև պաշտպանության նախարար Սուրեն Պապիկյանի՝ զորամասեր կատարած այցերը՝ դրանք համարելով անարդյունավետ։
«Խնդիրները խորքային են՝ կապված կառավարման, զինվորների զբաղվածության, հոգեբանական վիճակի և գաղափարական դաստիարակության հետ»,- նշել է նա։
Մանուկյանը նաև անդրադարձել է Ռազմական ոստիկանության ղեկավարության հարցին՝ ընդգծելով, որ այդ կառույցը պետք է ղեկավարեն համապատասխան մասնագիտական փորձ և հեղինակություն ունեցող անձինք։
ՈՒՂԻՂ ԵԹԵՐ
Ամենադիտված 
«Գուստավ» ռեստորանի մենեջերը կանանց զուգարանում գաղտնի տեսանկարահանումներ է իրականացրել․ ՆԳՆ-ն ստուգում է տեղեկությունը
