Զբոսայգում տեղի ունեցած հրաձգության հետևանքով ոստիկան է զոհվել․ ևս մեկը վիրավորվել է. Հարավային Կարոլինայում

ԱՄՆ-ի Հարավային Կարոլինա նահանգի Կոլումբիա քաղաքում գտնվող զբոսայգում տեղի ունեցած հրաձգության հետևանքով ոստիկան է զոհվել, ևս մեկը վիրավորվել է։ Կասկածյալը նույնպես սպանվել է, հայտնել է Կոլումբիայի ոստիկանապետ Ու. Հ. «Սքիփ» Հոլբրուկը, հաղորդում է Associated Press-ը։

Զոհվածը 29-ամյա Քրիստոֆեր Դելոնգն էր, որը ոստիկանությունում ծառայել էր երկու տարի։ Նա կին և երկու փոքր երեխա ուներ։ Երկրորդ տուժած ոստիկանը՝ Դևիդ Դայմոքը, գտնվում է կայուն վիճակում։

«Մեր սրտերը կոտրված են», — հուզմունքը չթաքցնելով՝ մամուլի ասուլիսի ժամանակ հայտարարել է Հոլբրուկը։

Կրակոցները հնչել են շաբաթ առավոտյան՝ կենցաղային կոնֆլիկտի վերաբերյալ ահազանգից հետո։ Մոտավորապես ժամը 9:30-ին մի կին ոստիկանությանը հայտնել է, որ մի տղամարդ, որի նկատմամբ դատարանի կողմից մոտենալու արգելք է գործում, վնասում է իր տան մոտ գտնվող գույքը։ Դելոնգն առաջինն է ժամանել դեպքի վայր, սակայն այդ պահին կասկածյալն արդեն հեռացել էր։

Կինը նկարագրել է տղամարդուն և նրա ավտոմեքենան։ Մոտ մեկ ժամ անց Դելոնգը, գտնվելով մոտակայքում, նկատել է մի մարդու այնպիսի ավտոմեքենայի մոտ, որը համապատասխանում էր ստացված նկարագրությանը, և հայտնել է կասկածելի անձի մասին։ Դեպքի վայր է ժամանել Դայմոքը։

Մի քանի րոպե անց ռադիոկապով հաղորդվել է, որ ոստիկանները վիրավորվել են, իսկ կասկածյալը վնասազերծվել է։

Վերջինս 33-ամյա Ադամ Թայլեր Դաուդին էր, որը նախկինում առնվազն չորս նահանգում բազմիցս ձերբակալվել էր։ Նրան առաջադրված մեղադրանքների թվում եղել են հասարակական կարգը խախտելը, դատարանի նկատմամբ անհարգալից վերաբերմունքը, հարբած վիճակում հասարակական վայրում հայտնվելը, վերահսկվող նյութերի պահումը և փորձաշրջանի պայմանների խախտումը։

Հրաձգության հանգամանքների քննությամբ կզբաղվի Հարավային Կարոլինայի իրավապահ մարմինների վարչությունը։ Գերատեսչությունից հայտնել են, որ քննությունը շարունակվում է։

Երեկոյան մամուլի ասուլիսից հետո Հոլբրուկը և իրավապահ մարմինների այլ ներկայացուցիչներ մասնակցել են հիվանդանոցից մեկնարկած սգո երթին։