ԱՄՆ-ում ձերբակալել են հայ «օրենքով գողի»

Նյու Յորքում ԱՄՆ-ի դաշնային դատարանը 37 ամսվա ազատազրկման է դատապարտել հայազգի «օրենքով գող» Արմեն Ղազարյանին: Ինչպես նշված է դատախազության տարածած մամլո հաղորդագրության մեջ, Ղազարյանը նաև պարտավորվում է վճարել 60.000 դոլար տուգանք, իսկ ազատության մեջ հայտնվելուց հետո 3 տարի նրա գործունեության նկատմամբ հսկողություն է սահմանելու ոստիկանությունը:

Գլենդելաբնակ Ղազարյանն իրեն մեղավոր է ճանաչել դրամաշորթության մեջ, որով նա զբաղվում էր հայ-ամերիկյան «Միրզոյան–Թերջանյան կազմակերպություն» անունը կրող խմբավորման շրջանակներում: Այս խմբավորումը մեղադրվում է ամերիկյան առողջապահական ընկերություններից մեկի նկատմամբ խադախության մեջ. նրանց հաջողվել էր 100 մլն դոլար պոկել դաշնային առողջապահական Medicare ընկերությունից:

Պզո մականվան տակ հանդես եկող Ղազարյանը ԱՄՆ-ում հաստատվել էր 1996-ին՝ որպես փախստական՝ հայտարարելով, որ իր հայրը զոհվել է ադրբեջանա-հայկական էթնիկ բախումների ժամանակ: Ինչպես տեղեկացնում է Ամերիկայի ձայնը, հետագայում պարզվել էր, որ այդ տեղեկությունը չի համապատասխանում իրականությանը, և այժմ Ղազարյանին դեպորտ է սպառնում:

«Միրզոյան–Թերջանյան կազմակերպության» գործունեությունն ԱՄՆ-ի իշխանությունները բացահայտել էին 2011-ին: Այն ժամանակ ձերբակալվել էր խմբավորման ավելի քան 50 անդամ: