Սպիտակ տան կայքի հակահայկական խնդրագրերն ուղիղ կապ ունեն ադրբեջանցի պաշտոնյաների հետ

Ամերիկայի հայ ազգային կոմիտեն պաշտոնապես հարցում է ուղարկել Սպիտակ տուն, թե անվտանգության ինչ երաշխիքներ է ապահովում We the People օնլայն ստորագրահավաքների համար` Ամերիկայի քաղաքացիական հասարակության օտար հակամանիպուլացիայից խուսափելու համար: Այս մասին նշված է կազմակերպության պաշտոնական էջում: 

Սպիտակ տան գլխավոր խորհրդատու Վալերի Ջարեթին ուղղված նամակում ANCA-ի գործադիր տնօրեն Արամ Համբարյանն անդրադարձել է Սպիտակ տան կայքում տեղադրված հայկական թեմաներին, հատկապես՝ մեկին, որում ներկայացվում են Ադրբեջանի բռնապետ Իլհամ Ալիևի լավ ֆինանսավորվող, սակայն՝ անհիմն և ատելությամբ լի հակահայկական արշավի հիմնական մտքերը, որոնք միտված են խեղաթյուրել Հայաստանի դեմ Ադրբեջանի ագրեսիայի և Լեռնային Ղարաբաղի Հանրապետության անկախության պատմությունը։

Համբարյանը նաև խնդրել է պարզաբանել, թե ինչ կանոններ գոյություն ունեն միջազգային մասնակցության համար, և թե անվտանգության ինչ երաշխիքներ են գործում օտարերկրյա խարդախությունից զերծ մնալու համար: 

Իր դիմումի մեջ Համբարյանը մասնավորապես նշում է, որ We the People կայքում հայտնվել է մի հաղորդագրություն, որում Ղարաբաղը ներկայացվում է հայկական ուժերի կողմից բռնազավթված Ադրբեջանի 20 % տարածք: Ինչպես հետագայում պարզվել է, այս խնդրագիրն ուղիղ կապ ունի Հեյդար Ալիևի հիմնադրամի հետ, որը ղեկավարում է Ալիևի մուլտիմիլիարդատեր կինը` Մեհրիբան Ալիևան: 

Ադրբեջանի նախագահ Իլհամ Ալիևը, ով բազմիցս հայտարարել է «Մեր հիմնական թշնամիներն ամբողջ աշխարհով սփռված հայերն են», մի քանի ամիս առաջ իր թվիթերյան էջում տեղադրել էր հաղորդագրություն, որում նշվում էր, թե իբր Հայաստանն առանց արժեքների պետություն է, իսկ Երևանը՝ ադրբեջանական տարածք, որը բռնազավթվել է հայերի կողմից: Հայ Դատի հանձնախումբը փաստերի հիման վրա Կոնգրեսին, ԱՄՆ կառավարությանն ու ԶԼՄ-ներին տեղեկացրել է Հայաստանի և Ղարաբաղի դեմ Ադրբեջանի կողմից հնչող սպառնալիքների և ագրեսիայի մասին: