Սաակաշվիլիի և Բուշի դեմ ահաբեկչություն կազմակերպելու համար մեղադրվող հայազգի Հարությունյանի պատիժը չի մեղմացվի

Վրաստանում ԱՄՆ-ի նախկին նախագահ Ջորջ Բուշի և Վրաստանի նախագահ Միխայիլ Սաակաշվիլիի դեմ ահաբեկչության փորձ կատարելու մեջ մեղադրվող հայազգի Վլադիմիր Հարությունյանի գործը չի վերանայվի: Այս մասին գրում է Грузиа-Online-ը` վկայակոչելով Հարությունյանի մոր` Անժելա Հարությունյանի խոսքերը Վրաստանի արդարադատության նախարարությունից ստացված նամակի հիման վրա:

2006-ին ԱՄՆ-ի այն ժամանակվա նախագահ Ջորջ Բուշի` Թբիլիսի կատարած այցի ժամանակ ահաբեկչություն կազմակերպելու փորձի համար ձերբակալվել և դատարանի կողմից ցմահ ազատազրկման էր ենթարկվել Թբիլիսիի բնակիչ, Վրաստանի քաղաքացի Վլադիմիր Հարությունյանը: Նա գտնվում է N7 պատժիչ հաստատությունում:

2013թ. հունվարին Վրաստանի արդարադատության նախարար Թեա Ցուլուկանին հայտարարել էր, որ Հարությունայի գործը չի վերանայվի պատժամիջոցը մեղմացնելու նպատակով: «Ես չեմ կարծում, որ ելնելով Վրաստանում համաներում շնորհելու հանգամանքից՝ այս գործը կարիք ունի վերանայման»,-հայտարարել է նախարարը: