Մոսկվայում ՀՀ դեսպանատունը նենգարարների է բացահայտել

Ռուսաստանում Հայաստանի դեսպանատունը հերքել է լուրերն այն մասին, թե հյուպատոսական բաժնի աշխատակիցը ծեծել է դեսպանատան այցելուներից մեկին: Ինչպես մեջբերում է REGNUM-ը, դիվանագիտական ներկայացուցիչը հայտարարել է, որ իրականում իբր ծեծի ենթարկված քաղաքացին բռնվել է խարդախություններ կատարելիս:

Նշենք, որ օրերս լուրեր էին տարածվել, թե Մոսկվայում ՀՀ հյուպատոսը ծեծել է ոմն Արտակ Հակոբյանի և խլել նրա մոտից փողերը, բջջային հեռախոսը, անձնագիրը: Լրատվամիջոցներում տարածված տեղեկության համար, ընդ որում, աղբյուր էր ծառայել Հակոբյանի ազգական ոմն Ժիրայր Թադևոսյանի հայտարարությունը:

Դեսպանատունը, սակայն, հայտարարել է, որ նշված երկու քաղաքացիները՝ Հակոբյանն ու Թադևոսյանը, խաբեբաներ են: Դիվանագետները նշում են, որ նրանք մոլորության մեջ էին գցում Հայաստանից դեսպանատուն այցելող քաղաքացիներին՝ դրամ շորթելու նպատակով՝ իրենց միջնորդություններն առաջարկելով այս կամ այն փաստաթուղթը ձևակերպելիս: Քաղաքացիները, հաճախ տեղյակ չլինելով իրենց իրավունքների մասին, կուլ էին գնում այդ խարդախություններին:

Դեսպանատունը նշում է, որ ապրիլի 11-ին Հակոբյանն ու Թադևոսյանը բռնվել էին հերթական խարդախությունն իրականացնելու ժամանակ: Թադևոսյանն այդ օրը 7.000 ռուբլի գումար էր վերցրել ՀՀ քաղաքացի ոմն Նազանի Ա.-ից՝ խոստանալով նրա համար ձևակերպել անհրաժեշտ փաստաթուղթը: Այնուհետև նրա կնոջ անունից դեսպանատուն էր ներկայացել, սակայն նրա վարքը կասկածելի էր թվացել աշխատակիցներին, ինչի արդյունքում խաբեբայությունը բացահայտվել էր: Նազանի Ա.-ին կանչել էին դեսպանատուն և առանց որևէ գումարի ձևակերպել անհրաժեշտ փաստաթուղթը:

Հակոբյանը դիմել է փախուստի: Նա դեսպանատանն է թողել իր բջջային հեռախոսը և անձնագիրը, ինչպես նաև մեկ այլ քաղաքացու՝ ոմն Ա. Հարությունյանի անձը հաստատող փաստաթուղթը: Այս պահին դեսպանատունը քայլեր է ձեռնարկում գործին ներգրավելու նաև ՌԴ իրավապահ մարմիններին. տեղեկացնում է лента.ру-ն: