«Ջրծաղիկ հիվանդությունը և նյարդաբանը իրար հետ ոչ մի կապ չունեն». Արթուր Սաքունց

Մամուլում և սոցիալական ցանցերում շատ է հրապարակվում այն տեսակետը, որ վերջերես զորամասերից մեկում ջրծաղիկի հետեւանքով մահացած զինվորի գործով իսկական մեղավորը չի ձերբակալվել. ի դեպ՝ այդ կարծիքը հայտնել են նաև զոհվածի հարազատները։ Այս թեմայով Լուրեր.сom-ը զրուցեց Հելսինկյան ասոցիացիայի Վանաձորի գրասենյակի ղեկավար, իրավապաշտպան Արթուր Սաքունցի հետ։ Վերջինիցս հետաքրքրվեցինք, թե արդյո՞ք նա տեղյակ է ձերբակալված բժշկի շուրջ ծավալվող իրադարձություններից, թե՞ոչ։

«Ես բնականաբար տեղեկություններ այդ առնչությամբ ունեմ, եվ կարող եմ հետևյալը ասել ու հետևյալ հարցադրումներն անել։ Ընդհանրապես ասեմ, որ ՊՆ քննչական բաժնի կողմից մահացության վերջին դեպքերի, ոչ միայն այս դեպքի, այլև՝ անցած տարվա մի քանի մահացության դեպքերի հետ կապված, հետեւյալ միտումը կա. հասարական պահանջների լուսաբանման, գնահատականների, քննադատությունների պարագայում փորձում են հիմա էլ ամեն գնով անպայման ինչ–որ մեղադրյալ գտնել եվ, ցավոք սրտի, իրական, օբյեկտիվ քննություն էլի չի կատարվում։ Այսինքն՝ քննության օբյեկտիվության, բազմակողմանիության և լրիվության հարցը դեռևս մնում է չլուծված։ Սա մեկ, որպես ընդհանուր գնահատական եմ ասում։ Երկրորդ՝ իրական պատասխանատուներին բացահայտելու ուղղությամբ էլի պատշաճ քննություն չի կատարվում», ասաց նա։
Անդրադառնալով կոնկրետ ջրծաղիկի դեպքին՝ Սաքունցն ասաց, որ զինծառայողը, որը գտնվել է այս պահին կալանավորված բժիշկի հսկողության ներքո, նյարդաբան է։ «Հարց է ծագում, թե նյարդաբանն ու ջրծաղիկ հիվանդությունը ի՞նչ կապ ունեն իրար հետ։ Եվ եթե ջրծաղիկ ախտորոշումը եղել է ի սկզբանե, ինչպե՞ս է հայտնվել նյարդաբանի մոտ։ Եթե ջրծաղիկ չի եղել, եւ այդ զինվորի մոտ ի սկզբանե եղել է նյարդային հիվանդություն, ապա արդյո՞ք համապատասխան բժիշկը պատշաճ քննություն կատարել է, թե՞ ոչ։ Իսկ եթե հետո է հայտնաբերվել ջրծաղիկը, ապա ո՞նց է եղել, որ այն հետո է հայտնաբերվել և ոչ թե սկզբում», նկատեց Սաքունցը։ Ըստ նրա՝ այս պարագայում խոսք է գնում ՀՀ զինված ուժերում առողջապահական ծառայության պատշաճության մասին։ Պատշաճ առողջապահական ծառայություն այս դեպքում գոյություն ունի, թե՞ ոչ, պարբերաբար զինծառայողների առողջական վիճակը համակողմանիորեն զննության ենթարկվում է, թե՞ ոչ, սինդրոմները նախօրոք բացահայտվո՞ւմ են, որպեսզի կանխարգելիչ քայլեր իրականացվեն, թե՞ ոչ. այսպիսի հարցադրումների շարք մատնանշեց Սաքունցը։ «Այս առումով ես խիստ կասկածում եմ, որ նյարդաբանը կարող է պատասխանատվություն կրել ջրծաղիկի համար», ասաց իրավապաշտպանը։
Վերջինս նաեւ ասաց, որ տվյալներ ունի, թե զինվորի դեմքն է ծամածռված եղել. «Բա ո՞րն է պատճառը։ Փոխանակ դրա ուղղությամբ գնան, թե որոնք էին այն պատճառները, որ մարդու մոտ նման իրավիճակ է առաջացել, այլ գործողություններ են իրականացնում», ասաց Սաքունցը։ Ըստ նրա՝ այս հարցը եւս պետք է քննության առարկա դառնա։
«Ջրծաղիկ հիվանդությունը և նյարդաբանը իրար հտ ոչ մի կապ չունեն։ Ինչպե՞ս է ստացվել, որ ջրծաղիկով հիվանդ զինվորը հայտնվել է նյարդաբանի մոտ։ Հո՞ նյարդաբանը չի գնացել զինվորին վերցրել բերել իր մոտ բուժելու, ուղղեգիր են չէ տվել։ Ո՞վ է այդ ուղեգիրը ստորագրել, ո՞վ է նախնական ախտորոշումը արել ։ Եթե այդ հարցերին դու վերջնական լուծում չես տվել, այսինքն այն, որ դու միմիայն կալանքը կիրառել ես որպես խափանման միջոց, եթե մյուս հարցերը չես պարզել, ինչպե՞ս ես խափանման միջոց կիրառել», եզրափակեց Սաքունցը։