ԱՄՆ-ի նախկին փոխնախագահ Ալբերտ Գորը Սնոուդենին դավաճան չի համարում

ԱՄՆ-ի նախկին փոխնախագահ Ալբերտ Գորն դավաճան չի համարում Էդվարդ Սնոուդենին, որը ԶԼՄ-ներին տեղեկություններ է փոխանցել ԱՄՆ-ի հատուկ ծառայությունների կողմից կատարվող լրտեսության գլոբալ ծրագրի վերաբերյալ, բայց նրան հերոս համարել էլ չի կարող: Այդ մասին, ինչպես տեղեկացնում է Գորը հայտարարել է Նեշվիլում (Թեննեսիի նահանգ)` ելույթ ունենալով տեխնոլոգիական խորհրդաժողովում:

Նրա խոսքով՝ եթե ընտրություն կատարվի այս երկու որակումների միջև, ապա ինքը ամենաքիչը հակված կլինի դավաճան համարելու Սնոուդենին: «Ակներև է, որ նա խախտել է օրենսդրությունը, և դա լավ չէ: Սակայն, դա անելով, նա լույս է սփռել օրենքների, այդ թվում՝ ԱՄՆ-ի Սահմանադրության ավելի լուրջ խախտումների վրա: Նա լավ ծառայություն է մատուցել բոլորին, քանի որ մեզ անհրաժեշտ է իմանալ, թե որքան հեռու են գնացել (հատուկ ծառայությունների լրտեսման ծրագրերը)»,-ասել է Գորը, որը փոխնախագահի պաշտոնն զբաղեցրել է 1993-ից մինչև 2001 թվականը:

Ամերիկյան կառավարության գնահատումներով՝ Սնոուդենն ԱՄՆ-ի ազգային անվտանգությանը վնաս է հասցրել մի քանի միլիարդ դոլարի չափով: Պենտագոնի փորձագետները եկել են այն եզրակացության, որ նա հափշտակել է շուրջ 1,7 մլն գաղտնի փաստաթուղթ, որոնք վերաբերում են ոչ միայն հատուկ ծառայությունների գործունեությանը, այլև ԱՄՆ-ի բոլոր զորատեսակների՝ ցամաքային զորքերի, ռազմաօդային ուժերի, ռազմածովային ուժերի և ծովային հետևակի գործողություններին, հաղորդել է ԻՏԱՌ-ՏԱՍՍ-ը: