Ադրբեջանը մտադիր չէ մտնել Եվրասիական միություն. պաշտոնական Բաքու

Ադրբեջանը դեռևս մտադիր չէ մտնել Եվրասիական տնտեսական միություն: Այս մասին ինչպես հաղորդում է «Թրենդ» լրատվական գործակալությունը, այսօր Բաքվում հայտարարել է Ադրբեջանի նախագահի աշխատակազմի արտաքին կապերի բաժնի ղեկավար Նովրուզ Մամեդովը:

Եվրասիական տնտեսական միությունը սկսելու է գործել 2015 թվականի հունվարից: Այն ստեղծվում է Ռուսաստանի, Ղազախստանի և Բելառուսի Մաքսային միության բազայի վրա: Եվրասիական տնտեսական միության ձևավորման մասին եռակողմ պայմանագիրն ստորագրվել է 2014 թվականի մայիսի 29-ին Աստանայում:

Ադրբեջանական լրատվամիջոցները մի քանի անգամ փորձեցին տարբեր պաշտոնյաների անունից լուրեր տարածել, իբր, Ադրբեջանին հրավիրել են անդամակցել ԵՏՄ: Սակայն անմիջապես հետևեցին հերքումներ, որ նման հրավեր այդ երկրին չի եղել: Ադրբեջանական լրատվամիջոցներն ապատեղեկատվական արշավի նոր փուլում իրենց խարդավանքներին խառնել են երկու երկրի նախագահի, երկու երկրի' բելառուսական և սերբական լրատվամիջոցների: Նրանք Բելառուսի նախագահին վերագրել են սերբական լրատվամիջոցներին տրված հարցազրույցում չհնչեցված միտք` Պուտինի կողմից Ադրբեջանին Եվրասիական տնտեսական միությանը միանալու հրավերի վերաբերյալ: Իրականում «Պոլիտիկաե»-ի կայքում հրապարակված հիշյալ հարցազրույցում Բելառուսի նախագահը որևէ անգամ չի հիշատակել Ադրբեջան բառը, անգամ չի նշել այդ աշխարհագրական տեղանունը Եվրասիական տնտեսական տարածքի հեռանկարների վերաբերյալ հարցի պատասխանում, որի տեսագրությունը առկա է Բելառուսի նախագահի պաշտոնական կայքում: