«Ուկրաինայում երկխոսությանը պետք է մասնակցեն բոլոր տարածաշրջանները». ԵԱՀԿ-ի գլխավոր քարտուղար

Ուկրաինայում երկխոսությունը պետք է ինկլյուզիվ բնույթ կրի և ներառի բոլոր տարածաշրջանների ներկայացուցիչներին: Այդ մասին ԵԱՀԿ-ի գլխավոր քարտուղար Լամբերտո Զանիերը հայտարարել է Ռուսաստանի արտաքին գործերի նախարար Սերգեյ Լավրովի հետ հունիսի 11-ին Մոսկվայում կայացած հանդիպմանը:

«ԵԱՀԿ-ն ակտիվ գործողություններ է ձեռնարկում ինչպես զինված առճակատման, այնպես էլ քաղաքական մակարդակով իրադրության ապաէսկալացման հասնելու համար»,-ասել է նա:

Զանիերն ընդգծել է, որ անհրաժեշտ է ուշադրությունը կենտրոնացնել հակամարտության ապաէսկալացման քաղաքական միջոցների, նախևեռաջ ՈՒկրաինայում համազգային երկխոսություն սկսելու վրա:

«Ես համաձայն եմ, որ երկխոսությունը պետք է ինկլյուզիվ բնույթ կրի և ներառի բոլոր տարածաշրջանները»,-հավելել է Զանիերը:

Այսօր ավելի վաղ Ուկրաինայի արտաքին գործերի նախարարի պաշտոնակատար Անդրեյ Դեշչիցան լրագրողներին հայտնել է, որ Ռուսաստանի, Ուկրաինայի և ԵԱՀԿ-ի ներկայացուցիչները կոնսուլտացիաներ են անցկացնում Ուկրաինայի արևելքի իրադրության կարգավորման ծրագրի, ինչպես նաև այդ հարցի շուրջ հնարավոր բանակցությունների ձևաչափի վերաբերյալ:

«Աշխատում է շփման խումբը, կոնսուլտացիաներ են անցկացվում ռուսական կողմի և ԵԱՀԿ-ի ներկայացուցիչների հետ: Մենք դեռևս չենք խոսում բանակցությունների մասին, դրանք կոնսուլտացիաներ են, որոնց ընթացքում քննարկվում են կարգավորման ծրագիրը և բանակցությունների ձևաչափը»,-ասել է Դեշչիցան, հաղորդել է ԻՏԱՌ-ՏԱՍՍ-ը: