Հնդկաստանում ծառից կախված են գտել ևս մեկ աղջկա

Եվս մեկ աղջկա են ծառից կախված գտել Հնդկաստանի Ութար Փրադեշի նահանգում: Նրա ընտանիքն ասում է, որ աղջկան բռնաբարել են հայտնում է BBC- ն:

Նույն այդ նահանգում մայիսին 14 և 16 տարեկան երկու աղջիկների նույնպես կախված էին գտել: Քրեագիտական փորձաքննությունը հաստատել է, որ դեռահասներին նախ բռնաբարել էին, իսկ հետո՝ կախ տվել ծացից:

Հնդկաստանի վարչապետ Նարենդրա Մոդին հունիսի 12-ին հանդիպում կունենա նահանգի ղեկավարության հետ: Ինչպես սպասվում է, հանդիպմանը կքննարկվի կանանց դեմ հանցագործությունները կանխելու ուղղությամբ տեղական իշխանությունների գործողությունների անարդյունավետության հարցը:

Հնդկաստանում սեռական բնույթի հանցագործությունների նկատմամբ իշխանությունների ուշադրությունն ուժեղացել է այն բանից հետո, երբ 2012 թվականին Դելիում մի խումբ տղամարդիկ ավտոբուսում բռնաբարեցին ու սպանեցին մի ուսանողուհու:

Անցյալ տարի տեղի ունեցած բողոքի զանգվածային ակցիաներից հետո կառավարությունը խստացրել է բռնաբարության համար նախատեսված պատիժները: Այժմ այդօրինակ հանցագործությունները քննվում են արագացված կարգով, առանձնապես ծանր դեպքերի համար սահմանված է մահապատիժ: