Որոշ հայ ընտանիքներ չեն կարողացել լքել Մոսուլը

Իրաքյան Մոսուլ քաղաքում հակակառավարական «Իրաքի և Շամի իսլամական պետություն» (ԴԱԻՇ) խմբավորման գործողությունների հետևանքով որևէ հայ չի զոհվել կամ վիրավորվել: Այս մասին «Ակոս»-ի հետ զրույցում ասել է Իրաքի Ազգային իշխանության պատասխանատուներից Պարույ ր Հակոբյանը:

Նա ընգծել է, որ Մոսուլում բնակվել է 65 հայ ընտանիք, որոնք հակակառավարական գործողությունների հետևանքով ստիպված են եղել սկսել լքել Մոսուլը: Սակայն որոշ ճանապարհների փակվելուց հետո այս ընտանիքներից մի քանիսը քաղաքը լքել չեն կարողացել: «Փախչողները գնում են Էրբիլ և Դուհոկ: Էրբիլում կառույցներ ունենք: Մենք պատրաստ ենք նաև ամեն տեսակի օգնություն տրամադրել նրանց: Սակայն մինչ այս պահը մեր կառույցներին օգնության որևէ պահանջ չի եկել: Փախչողները հիմնականում իրենց բարեկամների մոտ են գնում»,- նշել է Հակոբյանը' միաժամանակ արձանագրելով, որ իրենք հայկական եկեղեցիների վրա որևէ հարձակման մասին տեղեկություն չեն ստացել:

Էրբիլում գտնվող հայկական հիմնադրամի ղեկավարներից Շանթ Մուրադյանը հայտնել է, որ հայկական 48 ընտանիք հաջողությամբ կարողացել է հասնել Էրբիլ: «Մոսուլում երկու հայկական եկեղեցի ունեինք: Մեկը նորակառույց եկեղեցի էր և 2006 թվականին քանդվել էր: Մյուս` հին եկեղեցին փակվել էր: Ընտանիքների մեծ մասը գնացել է իրենց բարեկամների մոտ: Մեզ որևէ տեղեկություն չի հասել վիրավորների կամ զոհերի վերաբերյալ: Ասորիներն ու քելդանիներն էլ են գալիս: Այստեղ հասնող որոշ ընտանիքներ էլ անցնում են Դուհոկ»,- նշել է Մուրադյանը:

Իրաքի վարչապետ Նուրի ալ Մալիքին հունիսի 10-ին կոչ է արել խորհրդարանին երկրում արտակարգ դրություն հայտարարել: Պատճառը ԴԱԻՇ խմբավորման կողմից Մոսուլ քաղաքի գրավումն է: Վարչապետ ալ Մալիքին մամուլի ասուլիսի ժամանակ նշել է, որ կարևոր է հարևան երկրների սահմանների հսկողությունը՝ ավելացնելով, որ անհրաժեշտ է ՄԱԿ-ի աջակցությունն Իրաքին: Վարչապետը նաև կոչ է արել Իրաքի խորհրդարանին և նախարարություններին զբաղվել իրենց բնակավայրերից հեռացած ընտանիքները բնակության նոր վայրերով ապահովելու հարցերով: