Մալայզիան վճարումներ է սկսել անհետացած Boeing-ի ուղևորների ընտանիքներին

Մալայզիայի Malaysia Airlines ավիաընկերության ապահովագրորդը նախնական վճարումներ է սկսել ավելի քան երեք ամիս առաջ անհետացած Boeing 777-ի ուղևորների ընտանիքների անդամներին, 50 հազար դոլարի չափով փոխհատուցումներ են ստացել Մալայզիայի վեց և Չինաստանի մեկ ընտանիք: Այդ մասին հունիսի 13-ին հաղորդել է Straits Times սինգապուրյան թերթը:

Կորածների ընտանիքների անդամներին օգնության կոմիտեն գլխավորող թագավորության արտաքին գործերի փոխնախարար Համզա Զայնուդինը հայտնել է, որ համանման նախնական վճարումներ են նախատեսված կորած ինքնաթիռի բոլոր 239 ուղևորների և անձնակազմի անդամների ընտանիքներին:

«Ընտանիքներին ամբողջ ծավալով վճարումների հարցում մենք ստիպված կլինենք սպասել, քանի դեռ չենք հայտարարել MH370 չվերթի անհետանալու հարցը փակելու մասին»,- հավելել է փոխնախարարը:

Boenig 777-200 հանրանավը, որն իրականացնում էր Կուալա-Լումպուրից դեպի Պեկին MH370 չվերթը՝ 227 ուղևորներով և անձնակազմի 12 անդամներով, ներառյալ Չինաստանից 154 ուղևոր, ռադարների էկրանից կորել է լույս մարտի 8-ի գիշերը: Ենթադրվում է, որ ոչ ոք չի փրկվել:

Այս շաբաթվա սկզբին Մալայզիան առաջին անգամ հրապարակել է կորած ինքնաթիռի որոնումների համար իր ծախսերի գումարը՝ մոտավորապես 8,6 մլն դոլար: Ավելի վաղ հաղորդվել է, որ Ավստրալիայի կառավարությունը պլանավորում է ինքնաթիռի որոնման համար ծախսել շուրջ 84 մլն դոլար, հաղորդել է ՌԻԱ Նովոստին: