Կան ավելի քան 1400 նոր հայտնաբերված աստղային համակարգեր

Գիտնականները, դեռ 2013-ին վերլուծելով NASA-ի` «Կեպլերե» աստղադիտակի միջոցով ստացված տվյալները, առաջին անգամ պաշտոնապես հայտարարել են, որ գտել են «Երկիր մոլորակի կրկնօրինակը»:

Ըստ լուրերի` նոր հայտնաբերված մոլորակը գտնվում է, այսպես կոչված, «Կյանքի հատվածում»:

Լուրեր.com-ի հետ զրույցում Բյուրականի աստղադիտարանի աստղագետ Արթուր Կարապետյանը նշեց, որ կան ավելի քան 1400 նոր հայտնաբերված համակարգեր, այսինքն` աստղեր, որոնք իրենց շրջակայքում ունեն մոլորակներ:

«Ասել, թե որ մոլորակն ինչ կազմվածք ունի, մթնոլորտի ինչ բաղադրություն և այլն, դեռ չենք կարող: Բնությունն ինքն է ժամանակին կյանքի համար նպաստավոր պայմաններ ստեղծում մոլորակների վրա: Իսկ այս պահին մանրամասնել դեռ չենք կարող»:

Թեմայի շուրջ զրուցեցինք նաև Բյուրականի աստղադիտարանի տնօրեն Հայկ Հարությունյանի հետ:

Վերջինս նշեց, որ երբ խոսում են Երկիր մոլորակի «կրկնօրինակի» մասին, խոսքը վերաբերում է միայն մոլորակի չափերին:

«Երկիր մոլորակի «կրկնօրինակ» դեռ չի նշանակում` մթնոլորտի գոյություն, բուսական, կենսական պայմանների առկայություն: Սա բացառապես վերաբերում է Երկիր մոլորակի չափերին համապատասխան չափեր ունեցող նոր մոլորակի հայտնաբերմանը:

Այսինքն` սա մի մոլորակ է, որն իր չափերով է միայն նման Երկրին»,- ասաց նա:

Վերջինս նշեց նաև, որ գիտությունն անընդհատ փորձում է գտնել Երկրի չափերին համապատասխան կամ ավելի փոքր մոլորակներ, իսկ նման լուրերի տարածումը պարզապես նպաստում է նման ծրագրերի ֆինանսավորմանը:

Գայանե Համբարձումյան