«Աղքատության դեմ պայքարը պետք է դառնա ՄԱԿ-ի օրակարգի հիմքը». G77

Աղքատության դեմ պայքարը 2015 թվականից հետո պետք է դառնա ՄԱԿ-ի օրակարգի հիմքը: Դա հետևում է «77-ի խմբի» (G77) գագաթնաժողովի ամփոփիչ հռչակագրից, որը հանդիպման մասնակիցների կողմից ընդունվել է Բոլիվիայում:

Բոլիվիական ABI գործակալությունը նշել է, որ «77-ի խումբ+Չինաստան» ձևաչափով հանդիպումը հունիսի 14-15-ը տեղի է ունեցել Սանտա Կրուս քաղաքում: Գագաթնաժողովի հանրագումարային փաստաթուղթը, դրա կազմակերպիչների պլանների համաձայն, պետք է հիմք դառնա ՄԱԿ-ի նոր օրակարգի մշակման համար: Համաժողովի ընդունած փաստաթուղթը բաղկացած է 242 կետից:

«Աղքատությունն արմատախիլ անելն աշխարհի գլխավոր խնդիրն է, այն 2015 թվականից հետո պետք է մնա զարգացման հիմնական նպատակը»,-հայտարարել է Բոլիվիայի նախագահ Էվո Մորալեսը, որը ելույթ է ունեցել համաժողովի փակմանը և ընթերցել է դրա ամփոփիչ փաստաթղթի հիմնական դրույթները: Նրա խոսքով՝ «Սանտա Կրուսի հռչակագիրը» կոչ է անում ստեղծել ավելի արդարացի աշխարհակարգ, պայքարել անհավասարության և խոշորագույն կորպորացիաների Էքսպանսիայի դեմ:

Բացի այդ, հռչակագիրն ստորագրածները կոչ են անում՝ իրականացնել ՄԱԿ-ի Անվտանգության խորհրդի ընդգրկուն բարեփոխում, կլիմայի փոփոխման հիմնախնդիրը համարում են «մեր հարյուրամյակի ամենալուրջ խնդիրներից մեկը», մտահոգություն են հայտնում գլոբալ լրտեսման և լրտեսական նպատակներով սոցիալական ցանցերի օգտագործման հետևանքների կապակցությամբ, ինչպես նաև դատապարտում են «Կուբայի շրջափակումը և Մեծ Բրիտանիայի կողմից Մալվինյան (Ֆոլկլենդյան) կղզիների բռնազավթումը»:

«77-ի խումբը» 1964 թվականի հունիսի 15-ին հիմնվել է զարգացող երկրների կողմից սեփական տնտեսական շահերն առաջ մղելու համար: Սկզբնապես այն ուներ 77 մասնակից, այժմ այդ կազմակերպությունը ներառում է 133 պետություն: Ներկայում G77-ը զարգացող երկրների խոշորագույն միջպետական կազմակերպությունն է, որը գործում է ՄԱԿ-ի ու նրա մարմինների շրջանակներում, հաղորդել է ՌԻԱ Նովոստին: