Ադրբեջանի պաշտպանության նոր նախարարի օրոք ադրբեջանական բանակում զինվորների մահվան հետ կապված իրավիճակը վատացել է

Չնայած Ադրբեջանի պաշտպանության նախարարության և Զինված ուժերի համակարգում անցկացվող բարեփոխումներին, Զաքիր Հասանովի պաշտպանության նախարար նշանակվելուց հետո զինվորների մահվան փաստերի հետ կապված իրավիճակը, որը դարձել է ադրբեջանական բանակի գլխավոր խնդիրը, ոչ միայն չի լավանում, այլև վատանում է: Այս մասին հայտնում է haqqin.az լրատվական կայքը:

Կայքը նշում է, որ ինչքան էլ Ադրբեջանի ՊՆ մամուլի ծառայությունը հայտարարություններ է տարածում բարեհաջող իրագործված բարեփոխումների մասին, ինչքան էլ լուրեր են շրջանառվում այն մասին, որ Գլխավոր շտաբի պետ Նաջմեդդին Սադըգովի գլխավորությամբ խմբավորումը նոր նախարարին խանգարում է բարեփոխել ադրբեջանական բանակը, «մի բան պարզ է, որ զինվորների մահվան հետ կապված խնդիրը, որը հրաժարականի բերեց նախկին նախարար Սաֆար Աբիևին, լուծված չէ»:

«Ամեն օր մենք լսում ենք բանակում նոր ողբերգության մասին. զինվորները ինքնասպանություն են գործում, մահանում են հիվանդությունից, և ինչն ավելի վատ է` կրակում են իրար վրա», -նշում է կայքը:

Կայքը նաև հարց է բարձրացնում այն մասին, թե ինչու դժբախտ դեպքերից և հրամանատարական կազմի անփութության պատճառով մահերի թիվն ավելի է, քան հակառակորդի գնդակից սպանվածներինը: «Եթե նախկինում մենք դա կարողանում էինք վերագրել Սաֆար Աբիևի կոռումպացված գեներալիտետին, ապա ո՞ւմ վերագրենք այժմ: Միթե՞ Զաքիր Հասանովին», -հարցադրում է կայքը:

Ադրբեջանի լրագրողների ռազմական հետազոտությունների «Դոկտրինա» կենտրոնի տվյալներով` 2014 թվականի սկզբից մինչ այժմ ադրբեջանական բանակում կորուստը կազմել է 42 զինծառայող, նրանցից 28-ը զոհվել է ոչ մարտական պայմաններում, 73 զինծառայող էլ վիրավորվել կամ տարբեր աստիճանի վնասվածքներ է ստացել: