ՄԱԿ-ի գլխավոր քարտուղարը կոչ է արել վերականգնել Իրաքի կայունությունն ու խաղաղությունը

ՄԱԿ-ի գլխավոր քարտուղար Պան Գի Մունը կոչ է արել Իրաքի վարչապետ Նուրի ալ Մալիքին՝ երկխոսություն սկսել և փորձել կանգնեցնել բռնությունը երկրի տարածքում: Այդ մասին հունիսի 17-ին հաղորդել է Reuters գործակալությունը:

«Հուսով եմ, որ, օգտվելով հարևան երկրների և միջազգային հանրակցության աջակցությունից, մենք կկարողանանք օգնել Իրաքի կառավարությանը՝ նախևառաջ վերականգնելու երկրի կայունությունն ու խաղաղությունը»,-հայտարարել է ՄԱԿ-ի գլխավոր քարտուղարը Ժնևում կայացած մամուլի ասուլիսում:

Իրաքի իրադրությունը կտրուկ վատացել է հունիսի սկզբին, երբ «Իրաքի և Լևանտի իսլամական պետություն» (ԻԼԻՊ) խմբավորման զինյալները գրավեցին Մոսուլ և Թիկրիտ խոշոր քաղաքները և հայտարարեցին Բաղդադի վրա հարձակում ծավալելու մտադրության մասին: Իրաքի զինծառայողները ծայրահեղականների ուժերի ճնշման ներքո փախչում էին այդ շրջաններից, շատ զինվորականներ գերեվարվել են կամ մահապատժի ենթարկվել զինյալների կողմից:

Ավելի ուշ Իրաքի իշխանությունները հայտնել են, որ երկրի զինված ուժերին, Իրաքյան Քրդստանի տարածքում գործող ջոկատների, ինչպես նաև տեղի առանձին ցեղերի զինված կազմավորումների հետ համատեղ, հաջողվել է հետ մղել Բաակուբա քաղաքի վրա (Բաղդադից 60 կիլոմետր հյուսիս ընկած շրջանում) ԻԼԻՊ-ի հարձակումը, զինյալներին դուրս մղել Մոսուլից և ազատագրել Թիկրիտը, Սամարան և Թաջին: Անցկացված հակաահաբեկչական գործողության արդյունքում իրաքյան բանակի հսկողության տակ է անցել նաև Նինվեի նահանգի Տել Աֆար բնակավայրը, ոչնչացվել են ԻԼԻՊ-ի 250-ից ավելի զինյալներ, հաղորդել է ՌԻԱ Նովոստին: