«Սևոլ» լաստանավի անձնակազմը չի ընդունել ուղևորների զոհվելու պատասխանատվությունը

Հարավային Կորեայում խորտակված «Սևոլ» լաստանավի անձնակազմի անդամները, որոնց առաջադրվել են անփութության և ծովագնացության օրենքների խախտման մեղադրանքներ, հրաժարվել են ստանձնել ավելի քան 300 ուղևորների զոհվելու պատասխանատվությունը: Այդ մասին հունիսի 17-ին հաղորդել է Reuters գործակալությունը:

«Անձնակազմի անդամներն այն միասնական կարծիքին են, որ (ուղևորների) փրկության համար ամբողջ պատասխանատվությունն ընկած է առափնյա պահպանության վրա»,- դատարանում հայտարարել է մեղադրյալներից մեկի փաստաբան Իմ Չժու Յոնը:

Նա նաև հավելել է, որ, այն բանից հետո, երբ ջրասուզվող լաստանավից առափնյա պահպանությանն աղետի ազդանշան է ուղարկվել, և փրկարարները հասել են պատահարի վայր, անձնակազմի անդամների լիազորություններն սպառվել են:

Գործի նյութերի համաձայն՝ նավապետը, որին ցմահ բանտարկություն է սպառնում, առաջիններից մեկն է հեռացել սուզվող նավից՝ ուղևորի անվան տակ: Բացի դրանից, նավում գտնվող մարդիկ գանգատվել են, որ անձնակազմը նավաբեկության ժամանակ չի ձեռնարկել մարդկանց տարահանման պատշաճ միջոցներ, այլ բոլորին կոչ է արել մնալ տեղերում:

«Սևոլ» մարդատար լաստանավը, որտեղ եղել է 476 ուղևոր, նավաբեկության է ենթարկվել ապրիլի 16-ին Հարավային Կորեայի հարավարևմտյան ափի մոտ: Նավի խորտակման գործով ձերբակալված է 20 մարդ՝ «Չոնհեչժին» ընկերության աշխատակիցներ, անձնակազմի անդամներ և Կորեայի նավագնացության ասոցիացիայի աշխատակիցներ՝ անվտանգության կանոնների խախտման և կոռուպցիայի կասկածանքով, հաղորդել է ՌԻԱ Նովոստին: