ՄԱԿ-ի Անվտանգության խորհուրդը պահանջել է հետաքննել Ուկրաինայում ռուս լրագրողների զոհվելու հանգամանքները

ՄԱԿ-ի Անվտանգության խորհուրդը հայտարարություն է ընդունել, որով կոչ է անում հետաքննել Լուգանսկի մերձակայքում հրետակոծման հետևանքով «Ռուսաստան 1» հեռուստաալիքի լրագրող Իգոր Կորնելյուկի և հնչյունային ռեժիսոր Անտոն Վոլոշինի զոհվելու հանգամանքները: Այդ մասին հունիսի 18-ին հաղորդել է ՌԻԱ Նովոստին՝ հղում անելով ՄԱԿ-ին առընթեր Ռուսաստանի մշտական ներկայացուցիչ Վիտալի Չու րկինին:

ՄԱԿ-ի Անվտանգության խորհուրդը «մտահոգություն է հայտնել Ուկրաինայի ճգնաժամը լուսաբանող լրագրողների ձերբակալումների և նրանց վրա հարձակումների բազմաթիվ դեպքերի կապակցությամբ»: ԱԽ-ի անդամները ցավակցություն են հայտնել զոհված բոլոր լրագրողների ընտանիքներին, այդ թվում՝ ոչ միայն Ռուսաստանի հեռուստառադիոընկերության նկարահանող խմբի աշխատակիցների, այլև իտալացի լրագրող Էնդի Ռոկելլիի, որը մայիսի 25-ին հրետակոծման հետևանքով զոհվել էր Սլավյանսկի մերձակայքում:

Ռուսաստանի ԱԳ նախարարությունը դատապարտել է ռուս լրագրողների սպանությունը: Իսկ ՌԴ-ի վարչապետ Դմիտրի Մեդվեդևը նրանց զոհվելու համար մեղադրել է Ուկրաինայի ղեկավարությանը: ՌԴ-ի Հետաքննչական կոմիտեն քրեական գործ է հարուցել լրագրողների գնդակոծման փաստով:

Ուկրաինայի նախագահ Պյոտր Պորոշենկոն ՄԱԿ-ի խնդրանքով հանձնարարել է հետաքննել Կոռնելյուկի և Վոլոշինի զոհվելու հանգամանքները: