Վրաստանի ընտրություններում հաղթել է «Միասնական ազգային շարժումը». Բուրջանաձե

Վրաստանի խորհրդարանի նախկին խոսնակ, «Ժողովրդավարական շարժում-Միասնական Վրաստան» կուսակցության առաջնորդ Նինո Բուրջանաձեն այն կարծիքին է, որ Հանրապետության տեղական ինքնակառավարման մարմինների ընտրությունները դարձան «Միասնական ազգային շարժում» նախկին իշխող կուսակցության հաջողության վկայությունը, քանի որ նրա վարկանիշի աճ արձանագրեցին: Այս մասին տեղեկացնում է «Նովոստի Գրուզիան»:

«Վրացական երազանքի» փոխարեն ես մտածմունքի մեջ կընկնեի, քանի որ նրա վարկանիշը զգալիորեն ընկել է նախորդ ընտրությունների համեմատությամբ, իսկ Ազգային շարժումը, կարևոր չէ՝ ինչ ճանապարհով, բայց աճ է արձանագրում»,- հայտարարել է Բուրջանաձեն:

«Այդ ընտրություններն իրականում շահել է Ազգային շարժումը»,- հավելել է նա:

Հունիսի 15-ին Վրաստանում տեղի են ունեցել շրջանային ու քաղաքային խորհուրդների (սակրեբուլո) ընտրությունները, ինչպես նաև 59 շրջանային վարչակազմերի ղեկավարների ուղղակի ընտրությունները: Վրաստանի պատմության մեջ առաջին անգամ ուղղակի քվեարկության ճանապարհով ընտրվել են ոչ միայն Թբիլիսիի քաղաքապետը, այլև Վրաստանի 11 ինքնակառավարվող քաղաքների ղեկավարները: